Monqolustan tarixində ilk dəfə 60 milyon ton daş kömür ixrac edib
Bakı, 25 noyabr, AZƏRTAC
İlin sonuna bir aydan çox qalmasına baxmayaraq, Monqolustanda daş kömür ixracının həcmi nəzərdə tutulan göstəricini 10 milyon ton üstələyərək 60 milyon tona çatıb. 2023-cü ilin dövlət büdcəsində ölkənin daş kömür ixracı 50 milyon ton nəzərdə tutulmuşdu.
AZƏRTAC xəbər verir ki, Monqolustan hökuməti gələn ilin dövlət büdcəsi layihəsində 60 milyon ton daş kömür ixracını planlaşdırır və onun bir tonu üçün 140 dollar qiymət müəyyən edib.
Ölkənin Maliyyə Nazirliyi 2024-cü ilin təsdiq edilən büdcə layihəsində mədən sektorunun, həmçinin əlaqədar nəqliyyat və ticarət sahələrinin 6,5 faizlik iqtisadi artımının 7 faizə çatacağını bildirib. Həmçinin proqnozlara görə, ölkənin ötən il 12,5 milyard dollara çatan ixrac gəliri 2024-cü ildə 14,1 milyard dollara yüksələcək.
Qeyd edək ki, pandemiyadan öncəki 2019-cu ildə Monqolustan 36,7 milyon ton daş kömür ixrac edərək rekorda nail olmuşdu. Ötən il ölkənin ixrac gəlirlərinin 90 faizdən çoxu daş kömürün payına düşüb.
Bölmənin digər xəbərləri
