Müəllimlərin bilik və bacarıqlarının qiymətləndirilməsinin aparılması üçün keçirilən test imtahanları başa çatıb
Naxçıvan, 28 avqust, AZƏRTAC
Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiyanın Test Mərkəzində muxtar respublikanın dövlət ümumi təhsil müəssisələrində çalışan müəllimlərin bilik və bacarıqlarının qiymətləndirilməsinin aparılması üçün keçirilən test imtahanları yekunlaşıb.
Komissiyadan AZƏRTAC-ın Naxçıvan bürosuna bildirilib ki, test imtahanlarında iştirak etmək üçün sənəd təqdim edən 101 nəfərdən 88-i iştirak edib, 84 müəllim keçid balını toplayıb. İmtahanların nəticələri gündəlik olaraq Dövlət Qulluğu Məsələləri üzrə Komissiyanın rəsmi internet portalında (www.dqmk.nmr.az) yerləşdirilib.
Müəssisələrdə müəllimlərin bilik və bacarıq səviyyəsinin test üsulu ilə müəyyənləşdirilib üzə çıxarılması qiymətləndirilmə aparılan müəllimlərin həftəlik dərs yükü normasının optimallaşdırılmasının, aylıq vəzifə maaşlarının artırılmasının və maddi rifahının yaxşılaşdırılmasının təmin edilməsi məqsədi daşıyır.
Qeyd edək ki, bu günədək Dövlət Qulluğu Məsələləri üzrə Komissiya tərəfindən 3 belə test imtahanı keçirilib, imtahanlarda 587 müəllim iştirak edib, onlardan 501-i uğur qazanıb.
Bölmənin digər xəbərləri
