Münəvvər Hüseyn: Pakistan Şanxay Əməkdaşlıq Təşkilatına uğurla sədrlik edəcək
Bakı, 2 sentyabr, AZƏRTAC
Bişkek sammiti iki əsas səbəbə görə hələ də böyük əhəmiyyət daşıyır. Birincisi, dünya sürətlə çoxqütblülüyə doğru irəlilədiyi bir vaxtda sistem səviyyəsində əhəmiyyətli dəyişikliklərin baş verdiyini müşahidə edirik, ikincisi isə Yaxın Şərqdə iqtisadi təhlükəsizlik və siyasi nizamın dağılmasıdır. Beləliklə, bu iki aspekt baxımından iştirakçı ölkələrin bütün dövlət başçılarının qatıldığı ŞƏT sammiti hələ də böyük əhəmiyyət daşıyır. Sammitin gündəliyinin özü də çox mühüm və əhəmiyyətli olaraq qalır. Burada həm çoxqütblülüyə töhfə verilməsi, həm terrorizmlə mübarizə, o cümlədən regionda təhlükəsizliyin təmin olunması məsələləri var. Üçüncüsü isə iqtisadi rifah və ticarətin inkişafı məqsədlərinə nail olmaq üçün iştirakçı ölkələr arasında nəqliyyat əlaqələrinin gücləndirilməsinə töhfə vermək məsələsidir. Bu baxımdan Çinin təşəbbüsü ilə irəli sürülən Şərq-Qərb və Rusiyanın təşəbbüsü ilə irəli sürülən Şimal-Cənub nəqliyyat dəhlizlərini Azərbaycan da daxil olmaqla, Pakistan və Mərkəzi Asiya ölkələri arasında əməkdaşlığın qurulması yolu ilə birləşdirmək olar.
Bunu AZƏRTAC-a açıqlamasında pakistanlı beynəlxalq münasibətlər üzrə ekspert Münəvvər Hüseyn deyib.
“Bu baxımdan Pakistanın Baş naziri Pakistanla Mərkəzi Asiya ölkələri arasında dəmir yolu xətti ilə bağlı Rusiya Prezidenti Putinlə çox məhsuldar söhbət aparıb. Yeri gəlmişkən, bu müddət ərzində Pakistan ilk dəfə İrandan keçməklə Tacikistana yük göndərib. Bundan əlavə, Pakistanın Azərbaycanla ənənəvi, gözəl və möhkəm əməkdaşlıq münasibətləri formalaşıb”, – deyə o qeyd edib.
Ekspertin sözlərinə görə, münasibətlər yalnız siyasi və mədəni sahələrlə məhdudlaşmır, eyni zamanda, təhlükəsizlik sahəsində də sıx əlaqələri dəstəkləyirik. “İqtisadi əlaqələr də hər gün daha da möhkəmlənir. Bundan əlavə, Pakistan ŞƏT-ə sədrlik edəcək. Orta güc olan Pakistan öz siyasi və diplomatik nüfuzunu əhəmiyyətli dərəcədə gücləndirib. ABŞ ilə İran, eləcə də Yəmən ilə Səudiyyə Ərəbistanı arasında fəal vasitəçilik etməsi də buna töhfə verib. Bundan əlavə, Pakistan, Türkiyə və Səudiyyə Ərəbistanı arasında müdafiə paktı olan Məkkə sazişinin imzalanması da mühüm rol oynayıb”, – deyə o vurğulayıb.
M.Hüseyn hesab edir ki, məhz bu baxımdan Pakistan həm beynəlxalq, həm də regional siyasətdə çox nüfuzlu vasitəçi və əlaqələndiriciyə çevrilib. “Pakistanın Azərbaycanla gözəl münasibətləri var. Prezident İlham Əliyev Baş nazir Şahbaz Şəriflə səmimi dostluq münasibətlərini qoruyub saxlayır. Digər üzv ölkələrlə də münasibətlərimiz Pakistanın ŞƏT-ə uğurla sədrlik edə biləcəyinə əminlik verir”, – deyə ekspert fikrini yekunlaşdırıb.
Müəllif – Leyla Muradzadə
Bölmənin digər xəbərləri
