NARDARAN QƏSƏBƏSİNDƏ YENİ İDMAN ZALI İSTİFADƏYƏ VERİLMİŞDİR
AZƏRTAC xəbər verir ki, noyabrın 20-də Nardaran qəsəbəsində yeni idman zalının açılış mərasimi olmuşdur.
Mərasimdə çıxış edən gənclər və idman naziri Azad Rəhimov bildirmişdir ki, zal “Bakı şəhərinin qəsəbələrinin sosial-iqtisadi inkişafının sürətləndirilməsinə dair tədbirlər Proqramı”na uyğun olaraq inşa edilmişdir. Nazir paytaxtın digər qəsəbə və kəndlərində də bu tipli idman obyektlərinin tikilib istifadəyə veriləcəyini söyləmişdir.
Hazırda Bakının əksər qəsəbələrində, o cümlədən Balaxanı, Müşfiqabad, Pirşağı, Şağan və Hövsanda da bu cür idman kompleksləri tikilir. Bu gün nazirliyin qarşısında duran əsas vəzifə gənclərin asudə vaxtlarını səmərəli təşkil etməkdir. Nazir bu idman mərkəzlərində olimpiya çempionları yetişəcəyinə ümidvar olduğunu bildirmişdir.
Tədbirdə çıxış edən Sabunçu Rayon İcra Hakimiyyətinin başçısı Əlibala Əliyev bildirmişdir ki, cari ildə Nardaranda yeni uşaq bağçası tikilmiş, tibb məntəqəsi əsaslı təmir edilərək istifadəyə verilmişdir. 2009-cu ildə də bu istiqamətdə işlər davam etdiriləcəkdir.
Bildirilmişdir ki, Gənclər və idman Nazirliyinin sifarişi ilə inşa edilmiş idman zalının tikintisi üçün Bakı Şəhər İcra Hakimiyyəti tərəfindən 130 nömrəli məktəbin ərazisindən torpaq sahəsi ayrılmışdır.
“ADO-G” Məhdud Məsuliyyətli Cəmiyyəti tərəfindən inşa edilmiş idman zalı duş kabinəsi, soyunub-geyinmə otağı, içməli su anbarı ilə təchiz edilmişdir.
######
Bölmənin digər xəbərləri
