Natiq Şirinov: Azərbaycanın əldə etdiyi nəticələr gömrük sahəsində aparılan islahatların göstəricisidir
Bakı, 16 iyul, AZƏRTAC
Gömrük sistemində həyata keçirilən rəqəmsal transformasiya tədbirləri Azərbaycanın beynəlxalq reytinqlərdə mövqeyinin möhkəmlənməsinə mühüm töhfə verir.
AZƏRTAC xəbər verir ki, bu fikirləri Dövlət Gömrük Komitəsinin sədr müavini Natiq Şirinov "Bir Pəncərə" Rəqəmsal Logistika Platformasının rəsmi təqdimatı zamanı səsləndirib.
O bildirib ki, BMT-nin 2025-ci il üzrə Rəqəmsal və Davamlı Ticarətin Asanlaşdırılması üzrə Qlobal Sorğusunun nəticələrinə əsasən, Azərbaycan 94,57 faiz göstərici ilə dünya üzrə dördüncü, Cənubi və Şərqi Avropa, Qafqaz və Mərkəzi Asiya regionunda isə birinci yerdə qərarlaşıb: “Bu nəticə ölkədə gömrük sahəsində həyata keçirilən ardıcıl islahatların, dövlət qurumları arasında rəqəmsal inteqrasiyanın və "Bir Pəncərə" prinsipinin uğurlu tətbiqinin məntiqi nəticəsidir”.
Onun sözlərinə görə, rəqəmsal gömrük modelinin inkişafı Azərbaycanın beynəlxalq ticarət və logistika mərkəzi kimi mövqeyini daha da gücləndirəcək.
Bölmənin digər xəbərləri
