Nazir: Panama kanalının suverenliyi müzakirə mövzusu deyil
Bakı, 8 yanvar, AZƏRTAC
Panama kanalının suverenliyi müzakirə mövzusu deyil və kanalı yalnız panamalılar idarə etməlidir.
AZƏRTAC xəbər verir ki, Panamanın xarici işlər naziri Xavyer Martines-Aça Vaskes bunu mətbuat konfransında deyib.
“Kanalın suverenliyi müzakirə oluna bilməz. O, bəşəriyyətə və ticarətə xidmət etmək üçün tikilib. Bizim hər hansı bir münaqişədə iştirak etməmək zəmanətimiz dünyaya ən böyük töhfələrdən biridir. Kanalı yalnız panamalılar idarə etməlidir və bu, həmişə belə olacaq”, - deyə nazir mətbuata açıqlamasında bildirib.
Qeyd edək ki, bir müddət öncə ABŞ-ın yeni seçilmiş Prezidenti Donald Tramp Birləşmiş Ştatların kanala nəzarəti geri qaytarmaq üçün güc tətbiqini istisna etmədiyini və Panama hakimiyyəti ilə kanal məsələsinin müzakirə olunduğunu söyləyib.
Bölmənin digər xəbərləri
