Nazir: Yeni Zelandiya Azərbaycan ilə əməkdaşlığa xüsusi önəm verir
Kanberra, 24 avqust, AZƏRTAC
Azərbaycanın Avstraliyadakı müvəqqəti işlər vəkili Elcan Həbibzadə Kanberrada Yeni Zelandiyanın Baş nazirinin müavini, xarici işlər naziri Vinston Piterslə görüşüb.
AZƏRTAC xəbər verir ki, görüşdə Azərbaycan ilə Yeni Zelandiya arasında ikitərəfli münasibətlərin uğurla inkişaf etdiyi vurğulanıb. Söhbət əsnasında iki ölkə arasında dostluq əlaqələrinin inkişafından məmnunluq ifadə olunub. Azərbaycanın Yeni Zelandiya ilə münasibətlərə xüsusi diqqət yetirdiyini qeyd edən E.Həbibzadə qarşılıqlı əməkdaşlığın bundan sonra da hər iki tərəf üçün faydalı şəkildə davam edəcəyinə əminliyini ifadə edib.
Yeni Zelandiyanın xarici işlər naziri də öz növbəsində ölkəsinin Azərbaycan ilə əməkdaşlığa xüsusi önəm verdiyini diqqətə çatdırıb.
Qeyd edək ki, 2017-ci ildə Azərbaycan ilə Yeni Zelandiya arasında diplomatik münasibətlərin qurulmasının 25 illiyi tamam olub. İki ölkə arasında ticarət dövriyyəsi son illər artmaqdadır.
Ölkəmizin Avstraliyanın paytaxtı Kanberrada yerləşən səfirliyi, eyni zamanda, Yeni Zelandiya və Ficidə də akkreditə olunub.
Vüqar Ağayev
AZƏRTAC-ın xüsusi müxbiri
Kanberra
Bölmənin digər xəbərləri
