AZƏRTAC OPEK-in saytına istinadla xəbər verir ki, neft ixrac edən ölkələr təşkilatının - OPEK–in prezidenti şeyx Əhməd Fəhd əl-Sabah Çinin enerji problemlərini müzakirə etmək üçün bu ölkəyə səfər etmişdir. Həm də Küveytin energetika naziri olan şeyx Əhməd Çin rəhbərliyi ilə görüşlər keçirmişdir. Görüşlər zamanı neft istehlakına görə dünyada ikinci yeri tutan Çinlə Pekinin enerjiyə artan ehtiyacı və dünya enerji təchizatı ilə bağlı məsələlər müzakirə olunmuşdur. Bu, neft hasilatçıları ilə istehlakçıları arasında dialoq yaratmağa səy göstərən OPEK-in strategiyasının bir hissəsidir. Şeyx Əhməd jurnalistlərə demişdir ki, biz Çinin gələcək enerji ehtiyacları barədə hər şeyi bilmək istəyirik.
Təhlilçilərin fikrincə, səfərdən məqsəd bu ölkə ilə danışıqlara başlamaq və Çin zavodlarının OPEK-in xam neftini emal etmək imkanlarını araşdırmaq idi. OPEK-in prezidenti vurğulamışdır ki, 5 milyard dollar dəyərində layihə çərçivəsində Quanqdonq əyalətində neft emalı zavodunun və neft kimyası kompleksinin tikintisinə dair Küveytdə başlanmış danışıqlar başa çatdırılmışdır. Tərəflər layihəyə dair qarşılıqlı anlaşma memorandumu imzalamışlar.
