NEFTÇALADA ZƏMİLƏRDƏN 95 MİN TON MƏHSUL GÖZLƏNİLİR
Neftçala, 14 iyun (AZƏRTAC).Neftçala İcra Hakimiyyətinin Aqrar məsələlər şöbəsindən bildirmişlər ki, rayonda cari ildə əvvəlki ildəkindən 6120 hektar çox- 39800 hektar sahədə məhsul yetişdirilmişdir.
Mütəxəssislər mövsüm ərzində sahələrdən 95 min ton arpa və buğda yığılacağı qənaətindədirlər. Bu, yerli əhalinin ərzaq buğdasına olan ehtiyacını tam ödəməyə, etibarlı toxum fondu yaratmağa yetərli sayılır. Hələlik sahələrə 50 kombayn çıxarılmış, 7 min hektar arpa sahəsinin məhsulu biçilib döyülmüşdür. Hər hektar sahənin orta məhsuldarlığı 21 sentnerdir. İlkin mərhələdə dəmyə sahələrdə biçin aparıldığı nəzərə alınarsa, bu gözlənilən göstəcidir.
Rayonda biçinə 85 kombayn, 120-dək yükdaşıma texnikası hazırlanmışdır. Rayon İcra Hakimiyyətində yaradılmış qərargah biçin kompaniyasının gedişinə nəzarət edir. Mövcud kombayn və yükdaşıma texnikasının boşdayanması 2 səyyar təmir briqadasının yardımı ilə dərhal aradan qaldırılır.
Bölmənin digər xəbərləri
