Neftçalanın taxıl sahələrindən 123 min tondan çox məhsul yığılıb
Neftçala, 4 iyul, Mahir Babayev, AZƏRTAC
Neftçalanın fərdi fermer təsərrüfatlarında taxıl yığımı başa çatıb. Məhsul istehsalçıları zəmilərdən 123 min 661 ton taxıl yığıblar ki, bu da ötən illə müqayisədə 13 min 56 ton çoxdur.
Rayon Dövlət Aqrar İnkişaf Mərkəzindən AZƏRTAC-ın bölgə müxbirinə bildiriblər ki, biçin kampaniyasına mütəşəkkil başlayan torpaq mülkiyyətçiləri qısa müddətdə 43 min 66 hektar taxıl sahəsində biçin aparıb. Hər hektarın məhsuldarlığı 28,7 sentner olub ki, bu da ötən ildəkindən 0,4 sentner çoxdur. Yığılan məhsulun 102 min 312 tonu arpa, 21 min 349 tonu isə buğdadır. Arpa sahəsinin hər hektarının məhsuldarlığı 27,8, buğdanın isə 34,1 sentnerə çatıb. Ayrı-ayrı fermer təsərrüfatlarında məhsuldarlıq ümumi rayon göstəricisindən də yüksək olub.
Təcrübəli taxılçı Mürsəl Qəfərov həmişə olduğu kimi, bu il də biçini birincilər sırasında başa çatdırıb. “Bu mövsüm 32 hektar sahədə taxıl becərmişəm. Biçin apardığım sahənin hər hektarından 35 sentner yığmaqla 100 tondan çox taxıl götürmüşəm”, - deyə fermer bildirib.
Bölmənin digər xəbərləri
