“Neftçi” futbol klubunun muzey və fanşopu fəaliyyətə başlayıb
Bakı, 1 may, AZƏRTAC
Mayın 1-dən “Neftçi” futbol klubunun muzey və fanşopu fəaliyyətə başlayıb. Muzey və fanşop oyun və bazar günləri istisna olmaqla, hər gün saat 10:00-dan 18:00-dək fəaliyyət göstərəcək. Muzeyə girişin qiyməti 2 manat, 7 yaşadək uşaqların girişi isə ödənişsizdir.
Klubdan AZƏRTAC-a bildiriblər ki, muzeydə "Neftçi”nin yaranma tarixi ilə bağlı maraqlı məlumatlar, şəkillər və həmin dövrlərə aid eksponatlar öz əksini tapıb. Girişdə klubun SSRİ çempionatlarında geyindiyi formalar və müstəqillik dövründə qazanılmış kuboklar ("Birlik kuboku”, çempionluq kuboku, ölkə kuboku) nümayiş etdirilir. Ziyarətçilər ikinci otaqda xalq komandasına dövlət qayğısı, ulu öndər Heydər Əliyevin "Neftçi”nin üzvləri ilə görüşü, Azərbaycan Prezidenti İlham Əliyevin komanda üzvlərini qəbul etməsi haqqında video və foto materiallarla tanış ola bilərlər.
Fanşopda isə azarkeşlər komandanın yay və qış mövsümlərinə uyğun geyimlərini, eləcə də rəmzi hədiyyələr ala bilərlər. Gələcəkdə fanşopdakı məhsulların çeşidi alıcıların tələb və təkliflərinə uyğun olaraq artırılacaq.
Bölmənin digər xəbərləri
