“Neftçi” və “Qarabağ” azarkeşlərinə, “Kəpəz”lə “Sumqayıt” futbolçularına görə cərimələnib
Bakı, 3 dekabr, AZƏRTAC
AFFA İntizam Komitəsinin qərarları açıqlanıb.
AZƏRTAC milli assosiasiyanın rəsmi saytına istinadən xəbər verir ki, Misli Premyer Liqasının XV turunda qeydə alınan qayda pozuntularına hüquqi qiymət verilib.
“Araz-Naxçıvan”la oyunda azarkeşlər tərəfindən hakimlərin ünvanına kütləvi şəkildə təhqiramiz ifadələr səsləndirildiyinə və bu hal cari mövsümdə ilk dəfə yaşandığına görə “Turan Tovuz”a xəbərdarlıq edilib.
“Şamaxı” ilə matçda 4 futbolçusu sarı vərəqə görən “Kəpəz”, “Zirə” ilə görüşdə isə 5 oyunçusu xəbərdarlıq alan “Sumqayıt” 700 manat cərimələnib.
“Neftçi” “Qarabağ”la qarşılaşmada azarkeşlərin meydançaya kənar əşya atdığına görə 800, kütləvi şəkildə təhqiramiz ifadələr səsləndirdiklərinə və bu hal cari mövsümdə ikinci dəfə yaşandığına görə 500 manat cərimə edilib. Həmçinin, oyunun Bakı təmsilçisinin meydançaya gec çıxması səbəbindən gec başlaması “ağ-qaralar”ı 1500 manat ziyana salıb.
“Qarabağ” isə azarkeşlərin pirotexniki vasitədən istifadə etdiyinə görə 1500 manat cərimə ödəyəcək. Bundan başqa, kütləvi şəkildə təhqiramiz ifadələr səsləndirdiklərinə və bu hal cari mövsümdə ilk dəfə yaşandığına görə Ağdam təmsilçisinə xəbərdarlıq edilib.
Bölmənin digər xəbərləri
