NƏRİMANOV RAYONU QADINLARININ KONFRANSI KEÇİRİLMİŞDİR
AZƏRTAC xəbər verir ki, Azərbaycan qadınlarının III qurultayına hazırlıq çərçivəsində sentyabrın 3-də Nərimanov rayonu qadınlarının konfransı keçirilmişdir.
Rayon icra hakimiyyəti başçısının müavini Zaur Axundov Azərbaycan qadınlarının daim dövlət qayğısı ilə əhatə edildiyini bildirmişdir. Qeyd edilmişdir ki, ümummilli lider Heydər Əliyevin və ölkə Prezidenti İlham Əliyevin qadınların idarəetmə orqanlarında irəli çəkilməsi sahəsində gördükləri işlər cəmiyyətdə onların fəallığının yüksəlməsinə səbəb olmuşdur.
Konfransda rayon təşkilatının hesabatı dinlənilmişdir. Hesabatda göstərilmişdir ki, rayon qadınlarının sayı 80 min 900 nəfər təşkil edir. Onlar rayonun ictimai-siyasi həyatında fəallıq göstərərək yüksək nailiyyətlər əldə etmişlər. Rayonda məskunlaşan məcburi köçkün qadınların məşğulluğu təmin olunmuşdur. Bütün idarə və təşkilatlarda qadınlar yüksək səviyyədə təmsil olunur, rayonun iqtisadi, ictimai-siyasi, mədəni həyatında fəal iştirak edirlər.
Tədbirdə Ailə, Qadın və Uşaq Problemləri üzrə Dövlət Komitəsinin və digər qurumların nümayəndələri iştirak etmişlər.
Konfransda Azərbaycan qadınlarının III qurultayına nümayəndələr seçilmiş, Ağbirçəklər Şurası yaradılmışdır.
Bölmənin digər xəbərləri
