Nevroloq: Zəlzələ fobiyası gənclərdə qeyri-adekvat addımlarla özünü büruzə verir
Bakı, 9 fevral, AZƏRTAC
Türkiyədə yaranan dəhşətli zəlzələdən sonra insanlar arasında zəlzələ fobiyası ehtimalı gündəmə gəlib.
AZƏRTAC Xətai Tibb Mərkəzinin rəsmi feysbuk səhifəsinə istinadla bildirir ki, bunu mərkəzin Nevrologiya şöbəsinin müdiri, həkim-nevroloq Afaq Əliyeva deyib.
Onun sözlərinə görə, digər fobiyalardan fərqli olaraq, zəlzələyə qarşı qorxu uşaqlarda az rast gəlinir. “Uşaqlar zəlzələnin təhlükəsini hələ dərinliyinə qədər anlamadıqları üçün qorxu da fobiya halına çevrilmir. Böyüklərdə, xüsusən gənclərdə bu qorxu qeyri-adekvat addımlarla özünü büruzə verir. Qorxu qarşısıalınmaz hala gəldiyində insanlarda zəlzələ fobiyası yaranır. Bu hal insanların gündəlik həyatlarında, xüsusilə qidalanma və yuxu rejimlərində ciddi mənfi nəticələrə səbəb olur. Zəlzələ hadisəsini yaşayan insanlarda travma yarana bilər. Yuxusuzluq, qorxu, güclü narahatlıq hissi, depressiya, zəlzələ anını xatırlamaq kimi problemlər fobiyanın simptomları arasındadır”, - deyib.
Bəzi insanlarda zəlzələ qorxusunun normadan yüksək olduğunu qeyd edən nevroloq, bildirib ki, bu qorxunun səbəbi yaşanacaq qeyri-müəyyənlik hissidir: “Zəlzələ fobiyası digər psixoloji problemlərə də səbəb ola bilər. Əgər özünüzdə belə narahatlıq hissi müşahidə edirsinizsə, nevroloq-psixoloq məsləhətinə ehtiyacınız var”.
Bölmənin digər xəbərləri
