Niderland parlamentinə Xocalı soyqırımı ilə bağlı müraciət ünvanlanıb
Bakı, 29 fevral, AZƏRTAC
“Ana Vətən” Niderland Azərbaycanlı Qadınlar Birliyi Xocalı faciəsinin 24-cü ildönümü ilə əlaqədar Niderland Krallığında fəaliyyət göstərən bütün siyasi müəssisə və təşkilatlara, eləcə də parlamentin xarici işlər üzrə komissiyasının rəhbəri Anjelina Eijsinkə və qurumun üzvlərinə müraciət ünvanlayıb. Bu barədə AZƏRTAC-a Diasporla İş üzrə Dövlət Komitəsindən məlumat verilib.
Müraciətdə 24 il əvvəl erməni təcavüzkarlarının Xocalıda törətdiyi qətliam haqqında məlumat verilib. Bu faciənin ermənilərin azərbaycanlılara qarşı törətdiyi etnik təmizləmə və soyqırımı siyasətinin bir nümunəsi olmasına baxmayaraq, Ermənistanın həmin cinayətə görə heç bir beynəlxalq səviyyəli təşkilat tərəfindən məsuliyyətə cəlb edilməməsi diqqətə çatdırılıb.
Müraciətdə BMT Baş Assambleyasının 1948-ci il 9 dekabr tarixli 260 (III) saylı qərarı ilə qəbul olunmuş və 1951-ci ildə qüvvəyə minmiş Konvensiyası əsas gətirilərək, baş vermiş bu dəhşətli hadisənin soyqırımı adlandırılması tələb olunub. “Xocalı qətliamı öncədən planlaşdırıldığına və insanlar etnik mənsubiyyəti səbəbindən məhv edildiklərinə görə bu cinayətlər beynəlxalq və milli hüquq normalarına əsasən soyqırımı kimi qiymətləndirilməlidir. Ermənistan separatçıları tərəfindən törədilmiş vandalizm və zorakılıq aktları soyqırımı olaraq qəbul edilməlidir”, - deyə müraciətdə bildirilir.
Bundan başqa, təşkilat üzvləri Haaqa şəhərində Xocalı şəhidlərinin xatirəsinə qoyulmuş abidəni ziyarət ediblər. Haaqa-Azərbaycan məktəbinin şagirdləri Xocalı hadisələri haqqında məlumatların əks olunduğu broşürləri ətraf qəsəbələrin sakinlərinə paylayıblar.
Bölmənin digər xəbərləri
