NOAA: El-Nino hadisəsinin rekord həddə çatma ehtimalı yüksəkdir
Bakı, 20 avqust, AZƏRTAC
Amerika Birləşmiş Ştatlarının Milli Okean və Atmosfer Administrasiyasının (NOAA) məlumatına görə, El-Nino hadisəsinin proqnozlaşdırılandan daha güclü səviyyədə pik həddə çatacağı gözlənilir.
AZƏRTAC xəbər verir ki, NOAA-nın son proqnozlarına əsasən, El-Nino şəraiti sürətlə güclənməkdə davam edir. Payızın sonunda və qışın əvvəlində proqnozlaşdırılandan daha şiddətli səviyyədə pik həddə çatacağı gözlənilən El-Ninonun “rekord qıracaq” intensivliyə doğru irəlilədiyi bildirilir.
NOAA-nın məlumatına görə, El-Ninonun 1950-ci ildən başlayan müşahidələr tarixində qeydə alınmış ən güclü hadisə olması ehtimalı təxminən 70 faizdir. Onun 1982–1983-cü illərdə baş vermiş “Super El-Nino” hadisəsini də geridə qoyacağı gözlənilir.
Mütəxəssislər isə qlobal istiləşmənin təsirlərinin El-Nino ilə birləşərək isti hava dalğalarının və təbii fəlakətlərin şiddətinin artmasına səbəb ola biləcəyi barədə xəbərdarlıq edirlər.
Gözlənilən El-Nino hadisəsinin gücü səbəbindən 2027-ci ilin meteoroloji müşahidələr tarixində ən isti il rekordunu qıracağına, demək olar ki, əminliklə yanaşıldığı, 2026-cı ilin də eyni rekordu qırmasının mümkün olduğu bildirilir.
Müxbir – Göyçək Mahmudlu
Bölmənin digər xəbərləri
