NOHURQIŞLAQ KƏND ORTA MƏKTƏBİ İLƏ TANIŞLIQ
Azərbaycan Prezidenti İlham Əliyev martın 2-də İlham Abdulkərimov adına Nohurqışlaq kənd orta məktəbi ilə tanış olmuşdur.Direktor Səfər Səfərov dövlətimizin başçısına məlumat verdi ki, məktəbin əvvəlki binası 1936-cı ildə inşa olunmuşdu. Regionların sosial-iqtisadi inkişafı Dövlət proqramı çərçivəsində yeni binanın tikintisinə 2004-cü ilin ikinci yarısında başlanmış, 2006-cı il sentyabrın 1-də istifadəyə verilmişdir. Üçmərtəbəli, 24 sinif otağından ibarət məktəbdə tədrisi yüksək səviyyədə aparmaq üçün hərtərəfli şərait yaradılmışdır. Kompyuterlərlə təchiz edilən, laboratoriyaları olan məktəbdə 500-dən çox şagird təhsil alır, 72 müəllim çalışır.
Prezident İlham Əliyev ayrı-ayrı sinif otaqlarına, fənn kabinetlərinə baxdı, ingilis dili dərsində iştirak etdi. Məktəbin ingilis və fransız dili müəllimi Fazil Atakişiyev dövlətimizin başçısına müraciətlə dedi ki, cənab Prezident, şagirdlərimizin belə gözəl, müasir məktəbdə təhsil almasına görə Sizə və Azərbaycanın birinci xanımına səmimi təşəkkürümüzü bildiririk. Sizin gərgin əməyinizin, apardığınız siyasətin, regionların sosial-iqtisadi inkişafı sahəsində görülən işlərin nəticəsini bu məktəbdə hiss edirik. Çox sevindiricidir ki, bu işlər ölkəmizin bütün regionlarında görülür. O, bu məktəbdə xarici dil fənninin tədrisi sahəsində kifayət qədər uğurlar olduğunu vurğuladı. Bildirdi ki, məzunların bəziləri Avropanın bir sıra qabaqcıl təhsil ocaqlarında oxuyurlar. 30-dan çox fransız dili mütəxəssisi hazırlanmışdır və onlar müxtəlif yerli və xarici təşkilatlarda işləyirlər. Ulu öndərimizin maddi köməyi sayəsində məktəbimizin yetirməsi Ağasəlim Rəsulov Fransada təhsilini başa vurmuş, dilçilik üzrə doktorluq dissertasiyası müdafiə etmişdir. Keçən il məzunlardan biri yüksək - 659 bal toplayaraq, Dövlət İdarəçilik Akademiyasına qəbul olmuşdur.
Dövlətimizin başçısı uşaqların belə gözəl məktəbdə yaxşı təhsil almalarını, ingilis dilini mükəmməl öyrənmələrini tövsiyə etdi, informasiya və kompyuter sinfi ilə tanış oldu.Məktəbin pedaqoji kollektivini təbrik edən Prezident İlham Əliyev dedi ki, burada uşaqların yaxşı təhsil alması üçün bütün şərait var, avadanlıq, ləvazimat, kompyuter sinfi də var. Əsas odur ki, uşaqlar yaxşı oxusunlar və dəyərli insanlar olsunlar. Gələcəkdə Azərbaycanın inkişafı üçün fəaliyyət göstərsinlər.
Prezidentlə görüşə gələn Tüntül kənd orta məktəbinin direktoru Telman Abdulkərimov dövlətimizin başçısına müraciətlə dedi: Möhtərəm Prezident, biz də uzun illər yaxşı məktəbin arzusunda idik. 2006-cı ildə Sizin, çox hörmətli Mehriban xanımın qayğısı nəticəsində gözəl məktəb binası tikilib, müəllimlərin, şagirdlərin istifadəsinə verilibdir. Buna görə camaatımızın adından çox-çox minnətdarlıq edirəm. Gözəl şərait, zəngin kabinetlər, yaraşıqlı sinif otaqları yaradılıbdır. Müəllim kimi üzərimizə düşən vəzifəmiz, ulu öndərimizin dediyi kimi, azərbaycanlı olmağı ilə fəxr edən vətəndaşlar yetişdirməkdir. Siz də, Mehriban xanım da dağlar qədər əzəmətli, qüdrətlisiniz. O dağlar torpağa söykənib, onlara heç kim heç nə edə bilməz. Siz isə xalqa söykənmisiniz. Ona görə Sizə heç kim heç nə edə bilməz. Azərbaycan var, Siz varsınız, Siz varsınız, Azərbaycan da var. Bizim düşüncəmiz belədir. Biz bu iqtisadi inkişafı İlham Əliyevin iqtisadi möcüzəsi kimi qəbul edirik.
Prezident İLHAM ƏLİYEV təşəkkür edərək dedi ki, gənclər hər bir ölkənin gələcəyi deməkdir. Yəni, indi burada oxuyan uşaqlar gələcəkdə Azərbaycanda müxtəlif vəzifələrdə işləyəcəklər, Azərbaycanı idarə edəcəklər. Ona görə gənc nəsil vətənpərvər, xalqa bağlı olmalıdır. Vətəni sevməlidir, bilikli və peşəkar olmalıdır ki, həyatda öz yerini tutsun. İndi biz məktəblərin maddi-texniki bazasını möhkəmləndiririk, yeni məktəblər tikilir və tikiləcəkdir. Ən əsası isə, təhsilin səviyyəsi yüksəlməlidir. Bu işdə müəllimlərdən çox şey asılıdır. Mən də müəllimlərin fəaliyyətini çox yüksək qiymətləndirirəm. Siz böyük iş görürsünüz, uşaqları tərbiyə edirsiniz, təhsil verirsiniz. Arzu edirəm ki, uşaqlar yaxşı oxusunlar, müəllimlər də razı olsunlar. Mən bu yaxınlarda müəllimlərin maaşını artırdım, gələcəkdə də artıracağam ki, heç kəs maddi cəhətdən əziyyət çəkməsin. Sağ olun.
Bölmənin digər xəbərləri
