Növbəti monitorinq Xəzərin cənub sahilində keçirilib
Bakı, 19 mart, AZƏRTAC
Ekologiya və Təbii Sərvətlər Nazirliyinin Xəzər Kompleks Ekoloji Monitorinq İdarəsinin əməkdaşları növbəti monitorinqi Lənkəran, Astara və Masallı rayonlarının Xəzər sahili ərazilərində aparıblar. Dəniz suyundan nümunələr götürülüb, mikrobioloji təhlillər aparılıb. Monitorinq nəticəsində Xəzərə axıdılan tullantı sularında çirkləndirici maddələrin miqdarının normadan artıq olduğu müəyyənləşib.
İdarənin əməkdaşı Nərmin Babaşova AZƏRTAC-a bildirib ki, aparılan monitorinq zamanı Lənkəran rayonu ərazisindəki təmizləyici qurğular istismara yararsız olduğundan tullantı sularının heç bir təmizləmə prosesi keçmədən sahil zolağına, oradan da dənizə axıdıldığı məlum olub. Eyni zamanda, bir çox bələdiyyə ərazilərində formalaşan bərk məişət tullantılarının da təbii axarlara atıldığı aşkar edilib.
Onun verdiyi məlumata görə, Masallı rayonunda da vəziyyət eynidir. Monitorinq zamanı rayonda formalaşan tullantı sularının yeni istismara verilmiş bioloji təmizləyici qurğuda düzgün təmizləmə prosesi keçmədiyi və Viləşçay vasitəsilə dənizə axıdıldığı məlum olunub.
N.Babaşova Astara rayon təsərrüfatında formalaşan tullantı sularının da Pensərçay və Kələdəhnə çayları vasitəsilə Xəzər dənizinə axıdıldığını bildirib.
O qeyd edib ki, qarşıdan çimərlik mövsümü gəlir, bunu nəzərə alaraq hər bir çirkləndirici çirkab suların dənizə axıdılmasının qarşısının alınması üçün qısa bir zamanda zəruri tədbirlər görməlidir.
Bölmənin digər xəbərləri
