“Novosti iskustvennoqo intellekta” jurnalının növbəti nömrəsi Lütfi Zadəyə həsr olunmuşdur
Moskvada nəşr olunan nüfuzlu “Novosti iskustvennoqo intellekta” jurnalının növbəti nömrəsi bütünlüklə dünya şöhrətli Amerika alimi, soydaşımız Lütfi Zadənin həyat və yaradıcılığından bəhs edir.
Alimin 80 illik yubileyinə həsr olunmuş bu nömrə “Redaktor sözü” ilə açılır. Akademik Dmitri Pospelov bu yazısında elmdə inqilabi çevriliş etmiş soydaşımızın “Qeyri-səlis məntiq” və “Qeyri-səlis çoxluqlar” nəzəriyyəsini dünya elminə böyük töhfə kimi səciyyələndirir, həmin nəzəriyyələrin tədricən müasir texnika və texnologiyalara, eləcə də ayrı-ayrı elm sahələrinə təsir göstərərək onların istiqamətini dəyişdirdiyini vurğulayır.
Lütfi Zadənin nəzəriyyələri barədə görkəmli rus alimlərinin dialoqu ilə bağlı materiallarda və digər yazılarda soydaşımızın özü və elmi fəaliyyəti barədə ətraflı danışılır, o, müasir dünyamızın elm dahisi kimi səciyyələndirilir.
Oxucular bu nömrədə alimin “Qeyri-səlis məntiq” nəzəriyyəsinin mətni ilə də tanış ola biləcəklər.
Jurnalda Lütfi Zadə məktəbinin layiqli davamçıları, Azərbaycan MEA-nın müxbir üzvü Rafiq Əliyevin və professor Rəşad Əliyevin ali məktəblər üçün dərslik kimi nəzərdə tutulmuş “İntellektual sistemlər nəzəriyyəsi və onun tətbiqi” kitabından da geniş bəhs edilir.
Bölmənin digər xəbərləri
