Nur Xolis: İndoneziya Azərbaycanla insan hüquqları sahəsində əməkdaşlığın inkişafında maraqlıdır
Bakı, 22 oktyabr, AZƏRTAC
Azərbaycanın xarici işlər nazirinin müavini Xələf Xələfov İndoneziyanın İnsan Hüquqları üzrə Milli Komissiyasının sədri Nur Xolisin rəhbərlik etdiyi nümayəndə heyəti ilə görüşüb.
Xarici İşlər Nazirliyinin mətbuat xidmətindən AZƏRTAC-a bildiriblər ki, Nur Xolisin ölkəmizə səfərindən məmnunluğunu ifadə edən X.Xələfov iki ölkə arasında əlaqələrin inkişaf etdiyini vurğulayıb. O, Azərbaycanın İndoneziya ilə əlaqələrin genişlənməsində maraqlı olduğunu və iqtisadi sahədə, xüsusilə qeyri-neft sektorunda əməkdaşlıq üçün əlverişli imkanların mövcudluğunu diqqətə çatdırıb.
Ermənistan-Azərbaycan münaqişəsi və onun ağır nəticələri haqqında danışan Xələf Xələfov münaqişənin həlli istiqamətində ATƏT-in Minsk qrupunun fəaliyyətinin qaneedici olmadığını söyləyib. Nazir müavini BMT Təhlükəsizlik Şurası da daxil olmaqla, beynəlxalq təşkilatların münaqişənin həlli ilə bağlı təsirli mexanizmlərinin olmadığını, təcavüzkarın cəzalandırılması ilə bağlı iradəsizlik nümayiş etdirildiyini təəssüflə bildirib. O, BMT Təhlükəsizlik Şurasının münaqişə ilə bağlı dörd qətnaməsinin Ermənistan tərəfindən 20 ildən artıqdır yerinə yetirilməməsinə qarşı heç bir effektiv tədbirin görülmədiyini vurğulayıb.
Ermənistan tərəfindən törədilən vəhşiliklər, xüsusilə Xocalı soyqırımını qeyd edən nazir müavini rəsmi Yerevanın işğalçı siyasətinin ifşa olunması, Azərbaycanın hüquqlarının bərpa edilməsi üçün hökumətimizin beynəlxalq səviyyədə göstərdiyi səylərdən danışıb. O, bu xüsusda Xocalı soyqırımı ilə əlaqədar bir sıra ölkə parlamentlərində qəbul edilmiş qətnamələri, həmçinin “Çıraqov və başqaları Ermənistana qarşı” işi üzrə Avropa İnsan Hüquqları Məhkəməsinin qəbul etdiyi qərarı diqqətə çatdırıb.
Nur Xolis ölkəsinin Azərbaycanla insan hüquqları sahəsində ikitərəfli əməkdaşlığın inkişaf etdirilməsində maraqlı olduğunu bildirib. O, Azərbaycana səfərinin əsas məqsədinin Xocalı soyqırımının araşdırılması, bununla bağlı təsdiqləyici faktların toplanaraq dünyada tanıdılmasından ibarət olduğunu qeyd edib.
Görüşdə regional və qlobal məsələlər ətrafında fikir mübadiləsi aparılıb.
Bölmənin digər xəbərləri
