O, KÜVEYTDƏ DƏ BACARIQLI MÜHƏNDİS KİMİ AZƏRBAYCANI LƏYAQƏTLƏ TƏMSİL EDİR
Masallıda doğulub böyümüş Maqsud Əliyev Texniki Universiteti fərqlənmə diplomu ilə bitirdikdən sonra Almaniya və Böyük Britaniyada elmi tədqiqat işlərinə cəlb edilmiş, texnika elmləri doktoru elmi dərəcəsini almışdır. “Əsrin müqaviləsi” layihəsinin icrasına başlanandan vətənə dönən Maqsud Bakıdakı “YUPEK” boru üzləmə zavodunda və TPG-500 platformasının inşasında mühəndis və baş menecerin müavini işləmişdir. Onun metal və boru kəmərlərinin korroziyaya davamlılığının yüksəldilməsinə dair kəşfləri xarici ölkələrdə də yüksək qiymətləndirilmiş, dəfələrlə sertifikatlara layiq görülmüşdür. 3 elmi əsərin, 30-dan çox məqalənin müəllifi olan Maqsud TPG-500 platformasının tikintisi başa çatandan sonra bir neçə xarici şirkətdən dəvət almış, Küveyt-Şevron şirkətində aparıcı mühəndis işləməyə razılıq vermişdir. İndi həmyerlimiz Küveytdə bir sıra mühüm layihələrin işlənməsində əsas mütəxəssislərdən biri kimi yaxşı tanınır. O, alman, ingilis, rus, ərəb dillərini də mükəmməl bilir.
Ölkəmizin Küveytdəki səfirliyində AZƏRTAC-ın müxbirinə bildirmişlər ki, Maqsud səfirliyin keçirdiyi tədbirlərdə fəal iştirak edir.
Bölmənin digər xəbərləri
