“Ocaq” Mədəniyyət Mərkəzi Azərbaycan xalqı ilə həmrəy olduğunu bildirir
Tallin, 5 aprel, AZƏRTAC
Biz bu çətin və olduqca şərəfli bir anda Ali Baş Komandan, Azərbaycanın Prezidenti İlham Əliyevin ətrafında birləşərək Azərbaycan xalqının yanında olmağı özümüzə borc bilirik.
Bu sözləri AZƏRTAC-ın xüsusi müxbirinə “Ocaq” Azərbaycan Mədəniyyəti Mərkəzinin rəhbəri Roman Əliyev deyib.
R.Əliyev bildirib ki, Ermənistan hərbi qüvvələri müharibənin yenidən başlaması üçün səylər göstərir. Uzun illər ərzində ermənilər tərəfindən törədilən hərbi təxribatlar, hücumlar nəticəsində xeyli sayda hərbi qulluqçular və dinc sakinlər həlak olub.
O vurğulayıb ki, Azərbaycanın əsas məqsədi sülhün və əhalinin təhlükəsizliyinin təmin olunmasıdır. Artıq 20 ildən çoxdur ki, Ermənistan Azərbaycana qarşı təcavüzkarlıq siyasəti apararaq torpaqlarımızın 20 faizini işğal altında saxlayır. Azərbaycan sülhə nail olmağa və əhalinin təhlükəsizliyini qorumağa çalışır.
Roman Əliyev qeyd edib ki, Prezident İlham Əliyevin yürütdüyü balanslaşdırılmış xarici və daxili siyasət nəticəsində işğal altındakı doğma torpaqlarımızın geri qaytarıldığı gün heç də uzaqda deyil. Latviyada yaşayan azərbaycanlılar ordumuzun gücünə inanaraq, Qarabağın tezliklə azad olacağına əmindirlər. Xankəndidə üçrəngli milli bayrağımızın dalğalanması, 1 milyondan artıq qaçqın və məcburi köçkünün öz yurdlarına qayıtması üçün dünya azərbaycanlıları vahid məqsəd və hədəf ətrafında birləşməlidir.
Vətən uğrunda canından keçən şəhidlərimizə Allahdan rəhmət diləyirik.
Nigar Cəfərli
AZƏRTAC-ın xüsusi müxbiri
Tallin
Bölmənin digər xəbərləri
