RƏSMİ XRONİKA
OĞUZ RAYON İCRA HAKİMİYYƏTİNİN BAŞÇISI KAMİL RƏHİMOVUN ÇIXIŞI
-Möhtərəm cənab Prezident!
Hörmətli mərasim iştirakçıları!
Bu gün qədim Oğuz torpağına gəlişiniz rayonun həyatında çox əlamətdar, mühüm tarixi hadisədir. İkinci dəfədir ki, dövlət başçısı rayonumuza, oğuzluların görüşünə gəlmişdir.
Cənab Prezident, icazə verin, ümummilli liderimiz Heydər Əliyevin siyasi xəttinin layiqli davamçısını Oğuz rayonunun bütün əhalisi adından salamlayım. Biz əminik ki, Sizin bu səfəriniz yaddaşlarda silinməz izlər buraxacaq, bütövlükdə bölgənin ictimai-siyasi həyatına, iqtisadiyyatın inkişafına güclü təkan verəcəkdir. Sizin bölgələrə vaxtaşırı səfərləriniz, regionların sosial-iqtisadi inkişafı Dövlət proqramının icrasına şəxsən nəzarət etməyiniz sahibkarlığın inkişafı, işsizliyin aradan qaldırılması, yoxsulluğun azaldılması, iqtisadi və sosial layihələrin reallaşdırılması kimi qlobal vəzifələri həll etməyə imkan verir. Dövlət proqramının uğurla yerinə yetirilməsi Oğuz rayonunun da sürətli inkişafına təkan vermişdir. Bu gün hər bir Oğuz sakini bu inkişafı öz gündəlik həyatında hiss edir və buna görə də Sizə minnətdardır.
2005-ci ildə ilk dəfə Oğuz rayonunda olarkən 12 mənzilli yaşayış binasının şəhid ailələri və Qarabağ əlillərinin istifadəsinə verilməsi Sizin qayğıya daha çox ehtiyacı olan insanlara dəyərli hədiyyəniz olmuşdur. Eyni zamanda, Siz rayonun köklü problemləri ilə maraqlanmış, onların həllinə kömək göstərəcəyinizi bildirmişdiniz. Məhz bunun nəticəsidir ki, indi rayonda möhtəşəm Olimpiya İdman Kompleksinin, 100 çarpayılıq xəstəxananın, Qalaçay üzərində uzunluğu 330 metr olan körpünün inşası uğurla davam etdirilir. Bu da Sizin oğuzlulara olan böyük qayğınızın təzahürüdür.
Ölkədə sahibkarlığın inkişafı üçün Sizin tərəfinizdən yaradılmış əlverişli şərait rayonumuzda da bir çox sahənin inkişafında öz əksini tapmışdır. Bu gün Oğuzda yerli sahibkarlar tərəfindən istirahət mərkəzləri tikilib istifadəyə verilmiş, konserv, fındıq emalı zavodları, qum-çınqıl istehsalı və süd emalı sexləri və s. fəaliyyətə başlamış, rayonda 5177 yeni iş yeri açılmışdır ki, ondan da 1431-i daimi iş yeridir. Hazırda turizm və idman-sağlamlıq mərkəzi inşa olunur və 2007-ci ilin yayında onun istifadəyə verilməsi planlaşdırılır.
Möhtərəm cənab Prezident!
Sizin tapşırığınızla rayonda abadlıq və quruculuq işlərinin aparılması üçün ötən dövrlər ərzində 1,3 milyon manat vəsait ayrılması nəticəsində küçə və yollara 25 min kvadratmetr asfalt, səkilərə 8 min kvadratmetr üzlük plitə döşənmişdir. Hazırda şəhərin doqquz küçəsində işıqlandırma sistemi quraşdırılır. Mədəniyyət mərkəzinin əsaslı təmiri, şəhər parkında və küçələrdə abadlıq işlərinin aparılması üçün hazırlıq işləri görülür. Sizin qayğınızın nəticəsidir ki, son iki ildə rayonda 300 yerlik iki məktəb binası inşa edilmiş, üç məktəb əsaslı təmir olunmuş, 360 yerlik bir məktəb binasının inşası isə davam etdirilir.
Eyni zamanda, Heydər Əliyev Fondunun prezidenti, YUNESKO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsü ilə “Yeniləşən Azərbaycana yeni məktəb” proqramı çərçivəsində rayonda 640 yerlik dörd məktəb istifadəyə verilmişdir. Bu nəcib təşəbbüsə görə biz oğuzlular hörmətli Mehriban xanım Əliyevaya dərin minnətdarlığımızı bildiririk. Məlumat üçün bildirim ki, son 25 ildə Oğuzda cəmi 2 məktəb tikilmişdi.
Möhtərəm cənab Prezident!
Bildiyiniz kimi, təməlqoyma mərasiminə toplaşdığımız Oğuz-Qəbələ-Bakı su xəttinin çəkilməsinin təşəbbüskarı ulu öndərimiz Heydər Əliyev olmuşdur. Bu böyük əhəmiyyətə malik işi Siz reallaşdırırsınız. Bu nəhəng layihənin həyata keçirilməsi nəticəsində 300 nəfərədək oğuzlu işlə təmin olunacaqdır. Bu da Sizin bizə olan diqqət və qayğınızın təzahürüdür.
Möhtərəm cənab Prezident!
Sizin rayonumuza tarixi səfəriniz qüvvəmizi qat-qat artırır, bizi yeni-yeni uğurlara ruhlandırır. Oğuz rayonunun bütün əhalisi adından Sizi bir daha əmin edirəm ki, qarşımıza qoyduğunuz vəzifələrin öhdəsindən layiqincə gələcək, bütün tapşırıqlarınızı məsuliyyətlə yerinə yetirəcək, Sizin diqqət və qayğınız sayəsində rayonumuzu daim inkişaf etdirib, uğurdan-uğura aparacağıq.
Bu iftixar dolu anları biz oğuzlulara bəxş etdiyinizə görə hədsiz minnətdarlığımızı bildirir, Sizə cansağlığı, respublikamızın tərəqqisi, daha da zəngin ölkəyə çevrilməsi naminə fəaliyyətinizdə yeni-yeni uğurlar arzulayırıq.