Oğuzun arpa sahələrində orta məhsuldarlıq 40 sentner təşkil edir
Oğuz, 25 iyun, Mustafa Dadaşov, AZƏRTAC
Oğuz rayonunun təsərrüfatlarında taxıl biçini kampaniyası mütəşəkkil davam etdirilir. Cari mövsümdə rayonda 16 min 317 hektar taxıl sahəsinin məhsulunun biçilməsi nəzərdə tutulur. Taxıl əkinlərinin 6 min 499 hektarı arpa, 9 min 818 hektarı buğda sahələridir. İndiyədək 3000 hektarı arpa, 253 hektarı buğda olmaqla, 3 min 253 hektar sahənin məhsulu biçilib, 12 min 961 ton məhsul tədarük olunub. Hər hektardan orta məhsuldarlıq 39,8 sentner təşkil edir.
Bu barədə AZƏRTAC-ın bölgə müxbirinə Oğuz Dövlət Aqrar İnkişaf Mərkəzindən məlumat verilib.
Qurumdan bildirilib ki, tədarük olunan taxılın 12 min tonu arpa, 961 tonu buğdadır. Arpa sahələrinin hər hektarından orta hesabla 40 sentner, buğda sahələrindən isə 38 sentner məhsul götürülüb. Hazırda sahələrdə 52 kombayn işləyir.
Mərkəzdən verilən məlumata görə, təsərrüfatlarda tütün şitillərinin sahələrə köçürülməsi işi isə artıq yekunlaşmaq üzrədir. Oğuzlu fermerlər indiyədək 177 hektar sahədə tütün əkiblər və bu iş davam etdirilir.
Bölmənin digər xəbərləri
