Ölkədə müvəqqəti olma müddəti başa çatan əcnəbilərin icazələri avtomatik uzadılıb
Bakı, 20 may, AZƏRTAC
Azərbaycan ərazisində olan və koronavirusla bağlı pandemiya səbəbindən ölkəni tərk edə bilməyən əcnəbilərin ölkədə müvəqqəti olma müddətinin uzadılması üçün müraciət edilməsi zərurəti aradan qaldırılıb.
AZƏRTAC xəbər verir ki, bu barədə mayın 20-də DMX-nin rəisi Vüsal Hüseynov “Pandemiya dövründə Dövlət Miqrasiya Xidmətinin fəaliyyəti və ölkəmizdə olan əcnəbilərə göstərilən xidmətlər” mövzusunda keçirilən onlayn mətbuat konfransında məlumat verib.
Xidmət rəisi bildirib ki, Azərbaycanda kifayət qədər vizasız yaşayan miqrant var. Onların işini asanlaşdırmaq üçün yaşama müddəti başa çatanların icazəsi mayın 31-dək avtomatik uzadılıb. Belə ki, əvvəllər miqrant ölkədə yaşama müddətini uzatmaq üçün müraciət etməli idi. Biz bu problemi həll etdik və həmin şəxslərin müddətini müraciətsiz 60 gün uzatdıq. Mart ayından sonra həmin miqrantların yaşama müddəti 30-60 gün uzadılıb. Biz yeni qərar qəbul etdik ki, həmin şəxslər müraciət etmədən onların yaşama müddəti sərhədlərdə gediş-gəliş bərpa olunan müddətə qədər artırılsın.
Vüsal Hüseynov qeyd edib ki, dövlət sərhədində tətbiq olunan məhdudiyyətlər aradan qaldırıldıqdan sonra həmin şəxslərin müraciətlərinə baxılacaq və müvafiq qərar qəbul olunacaq.
Bölmənin digər xəbərləri
