ÖLKƏDƏ TAXIL BİÇİNİNƏ İLK OLARAQ AĞDAŞDA BAŞLANMIŞDIR
Ağdaş, 5 iyun (AZƏRTAC). Azərbaycanda taxıl biçini kampaniyasına ilk olaraq Ağdaş rayonunun Ərəbocağı kəndində başlanılmışdır.
Rayon icra hakimiyyətindən bildirmişlər ki, bu kəndin torpağı taxılın tez və keyfiyyətli yetişməsi üçün əlverişli şəraitə malikdir.
Cari ildə kəndin fermerləri və torpaq mülkiyyətçiləri 900 hektar sahədə taxıl yetişdirmişlər. Artıq 6 gündür ki, kənddə taxıl biçilir. Taxılın vaxtında və itkisiz yığılması üçün sahələrə 6 kombayn və 10-a yaxın yük maşını çıxarılmışdır. Taxıl istehsalçıları hər hektardan 40 sentner məhsul götürürlər.
Rayonun digər kəndlərində isə taxıl biçininə son hazırlıq görülür. Ümumiyyətlə, bu il Ağdaşda 15 min 434 hektar sahədə taxıl yetişdirilmişdir. Məhsulun vaxtında və itkisiz biçilməsi üçün 55 kombayn təmir edilərək tam işlək vəziyyətə gətirilmişdir.
Bölmənin digər xəbərləri
