ÖLKƏDƏ TAXIL QITLIĞI OLMAYACAQDIR
AZƏRTAC xəbər verir ki, havaların qeyri-sabit keçməsi taxıl biçininin ləngiməsinə səbəb olmuşdur. Kənd təsərrüfatı naziri İsmət Abasovun sözlərinə görə, əvvəlki illərdə iyunun 15-də arpa biçini başlanır və kampaniya 10 gün ərzində başa çatdırılırdı. Hazırda ölkəmizdə buğdanın yalnız 50 faizi biçilmişdir.
Nazir bəyan etmişdir ki, taxıl qıtlığı ilə bağlı yayılan söz-söhbətin əsası yoxdur. Bu il Azərbaycanda taxıl qıtlığı olmayacaqdır. Havaların qeyri-sabit keçməsinə baxmayaraq, ilin sonuna qədər ölkəmizdə 1,8-2 milyon ton taxıl istehsalı gözlənilir. Ərzaq buğdasına tələbat isə cəmi 1 milyon 530 tondur. Hələlik üç aylıq ehtiyatımız vardır.
Xaricdən gətirilən taxılın bahalaşmasına gəlincə, İsmət Abasov demişdir ki, hökumət bütün vasitələrdən istifadə edərək bu məsələnin ölkədəki bazara təsirini azaltmağa çalışır. Ümumiyyətlə, çörəyin qiymətinin süni şəkildə artırılmasına yol verilməyəcəkdir.
Bölmənin digər xəbərləri
