Ölkəmizdə iribuynuzlu mal-qaranın 49,1 faizini inək və camışlar təşkil edir
Bakı, 18 aprel, AZƏRTAC
Cari ilin yanvar-mart aylarında quş əti də daxil olmaqla diri çəkidə 138,3 min ton ət, 501,4 min ton süd, 543,5 milyon ədəd yumurta istehsal edilib. Bu da 2022-ci ilin müvafiq dövrünə nisbətən ət istehsalında 3 faiz, süd istehsalında 1,7 faiz, yumurta istehsalında 14 faiz artım deməkdir.
Dövlət Statistika Komitəsindən AZƏRTAC-a bildirilib ki, aprelin 1-i vəziyyətinə ölkə üzrə 7 milyon 360,8 min baş qoyun və keçi, 2 milyon 551,8 min baş iribuynuzlu mal-qara, o cümlədən 1 milyon 253,2 min baş inək və camış, 5084 baş donuz mövcud olub.
İribuynuzlu mal-qaranın 49,1 faizini inək və camışlar təşkil edir.
Cari ilin yanvar-mart aylarında quşçuluq müəssisələrində diri çəkidə 23,5 min ton (keçən il 19,8 min ton) quş əti və 269,4 milyon ədəd (keçən il 191,7 milyon ədəd) yumurta istehsal olunub. Ümumilikdə bu müəssisələr üzrə cəmi quşların sayı 9 milyon 813,7 min baş olub, hər yumurtlayan toyuqdan orta hesabla 67 ədəd yumurta alınıb.
Bölmənin digər xəbərləri
