ÖLKƏNİN TƏBİİ QAZLA TƏMİN EDİLMƏSİ PROBLEMLƏRİNƏ AYDINLIQ GƏTİRİLMİŞDİR
AZƏRTAC xəbər verir ki, fevralın 7-də “Azəriqaz” Qapalı Səhmdar Cəmiyyətində keçirilmiş mətbuat konfransında əhalinin təbii qazla təmin edilməsini sabitləşdirmək məqsədi ilə son vaxtlar görülmüş işlərdən ətraflı bəhs olunmuşdur.
Cəmiyyətin sədr müavini Nazim Səmədzadə əvvəlcə təbii qazın qəbul olunması, saxlanması və nəql edilməsi ilə bağlı həyata keçirilmiş tədbirlərdən danışdı. O bildirdi ki, respublikamızın mavi yanacağa tələbatını ödəmək məqsədi ilə “Azəriqaz” ötən il 9 milyard 695 milyon kubmetr təbii qaz qəbul edərək istehlakçıların istifadəsinə vermişdir. Bu, əvvəlki illə müqayisədə 76 milyon kubmetr çoxdur.
Mətbuat konfransında qaz təsərrüfatı infrastrukturunu genişləndirmək, yeraltı anbarlarda qaz ehtiyatını artırmaq, respublikamızda mavi yanacağın hasilatını yüksəltmək, yeni kəmərlər çəkmək, qaz sayğacları quraşdırmaq sahəsində bu il görüləcək işlərdən ətraflı danışıldı. Bildirildi ki, ötən il 21,1 kilometr yeni qaz xətti əsaslı təmir edilmiş, 98 kilometr uzunluğunda qaz kəməri çəkilmişdir. Şirkətin daxili imkanları hesabına görülmüş bu işlərə 38 milyard manat vəsait xərclənmişdir.
Bu il respublikamızda 120 min qaz sayğacı quraşdırılacaqdır. Kütləvi informasiya vasitələrinin nümayəndələrinə bildirildi ki, Azərbaycanda 1 milyon ədəd sayğaca tələbat var. Bunu ödəmək üçün respublikamızda sayğac istehsalını qaydaya salmaq qərara alınmışdır.
Mətbuat konfransında istehlakçıların təbii qazla sabit olaraq tam təmin edilməsi ilə bağlı jurnalistlərin suallarına cavab verilmişdir.
Bölmənin digər xəbərləri
