Ordubad, 3 dekabr, AZƏRTAC

Ümummilli liderimiz Heydər Əliyev deyib: “Mən istəyirəm ki, mənim arzum, istəklərim, Azərbaycan dövləti haqqında, müstəqil Azərbaycanın gələcəyi haqqında və Azərbaycanın ayrılmaz hissəsi olan Naxçıvan haqqında planlarım yerinə yetirilsin”. Muxtar respublikada ulu öndər Heydər Əliyevin arzuları, planları artıq reallığa çevrilib, Naxçıvan onun yolu ilə gedərək tərəqqiyə qovuşub. Muxtar respublikanın digər bölgələri kimi Ordubad rayonu da öz simasını dəyişir, yeni görkəm alır, kəndlərin inkişafı, abadlaşdırılması diqqətdə saxlanılır. Rayonun hərtərəfli dövlət qayğısı ilə əhatə olunan və böyük turizm potensialı olan yaşayış məntəqələrindən biri də Dırnısdır. Kənddə geniş tikinti-quruculuq işləri aparılıb, əhali rahatlığına xidmət edən sosial obyektlər tikilib.

Dırnıs kənd məktəbində müasir tədris imkanları mövcuddur

Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, dekabrın 3-də Dırnıs kənd tam orta məktəbinin yeni binası istifadəyə verilib.

Naxçıvan Muxtar Respublikası Ali Məclisinin Sədri Vasif Talıbov məktəbdə yaradılan şəraitlə tanış olub.

Məlumat verilib ki, 3 mərtəbədən ibarət olan 216 şagird yerlik məktəbdə 17 sinif otağı, kimya, biologiya və fizika laboratoriyaları, 2 elektron lövhəli sinif, şahmat sinfi, kompüter, psixoloq və müəllimlər otaqları, hərbi kabinə, STEAM kabinəsi, kitabxana, qarderob və idman zalı yerləşir. Kitabxana fondunda 4550 kitab vardır.

Ali Məclisin Sədri bölgələrin tarixi ilə bağlı nəşr olunmuş kitabların kitabxanalara verilməsi barədə tapşırıq verib.

STEAM kabinəsində 1 elektron lövhə, 2 kompüter, 3D printer quraşdırılıb. Kabinə mikrobit, arduino setləri və digər öyrədici STEAM qurğuları, həmçinin yeni nəşr olunan ədəbiyyat və dərsliklərlə təchiz edilib. Şagirdlər hazırladıqları “3D printerdə hazırlanmış kəşfiyyatçı tank”, “Yanğın əleyhinə xəbərdaredici qurğu” və “Xətt izləyən robot” layihələrini təqdim ediblər.

Müəllim Etibar Süleymanov yaradılan şəraitə görə minnətdarlıq edib.

Məktəbdə internetə çıxışı olan 20 kompüter və 4 elektron lövhə quraşdırılıb. Ali Məclisin Sədri elektron lövhəli sinifdə “Naxçıvanqala” Tarix-Memarlıq Muzey Kompleksi ilə 200-dən artıq təhsil müəssisəsi arasında “Naxçıvan qalaları” mövzusunda keçirilən interaktiv dərsi izləyib.

Məktəbin kimya, biologiya və fizika laboratoriyaları müasir avadanlıqlarla təmin olunub. Əyani vasitələrlə təminat dərslərin təcrübə yolu ilə keçirilməsinə imkan yaradır. Bu da dərsləri daha yaxşı qavramaqda kömək edir, biliyin təcrübə əsasında möhkəmləndirilməsinə şərait yaradır.

Gənc nəslin hərbi-vətənpərvərlik ruhunda tərbiyəsi, onların hərbi biliklərə yiyələnməsi sonrakı dövrdə peşəkar hərbçi kimi yetişmələrinə və formalaşmalarına xidmət edir. İstifadəyə verilən hərbi kabinə, bu mənada, mühüm əhəmiyyət daşıyır. Bildirilib ki, hazırda məktəbin 1 məzunu Azərbaycan Ali Hərbi Məktəbinin 3-cü kursunda təhsilini davam etdirir. 5 məzun isə zabit kimi Azərbaycan Silahlı Qüvvələrində xidmət edir. Onlar Vətən müharibəsi iştirakçılarıdır. Məktəbin bir məzunu, kapitan Vüqar Nəcəfov İkinci Qarabağ müharibəsində şücaət göstərərək şəhidlik zirvəsinə ucalıb. Məktəbin hərbi müəllimi isə Naxçıvan Əlahiddə Ümumqoşun Ordunun təşkil etdiyi zabit hazırlığı kursunu bitirərək leytenant rütbəsi alıb.

Ali Məclisin Sədri Vətən müharibəsi iştirakçıları ilə şagirdlər arasında görüşlərin keçirilməsi barədə tapşırıq verib.

Məktəbin bütün lazımi əyani vasitələrlə təchiz olunmuş şahmat sinfi, geniş idman zalı və məktəbin həyətində qurulan açıq idman qurğuları şagirdlərin fiziki sağlamlığına və əqli inkişafına xidmət edəcəkdir. İdman zalında bədən tərbiyəsi və fiziki tərbiyə fənlərinin tədrisi, eləcə də şagirdlər arasında bir sıra idman növləri üzrə yarışların keçirilməsi üçün müasir şərait mövcuddur. İdman zalına baxış zamanı bildirilib ki, məktəbdə basketbol və tennis idman klubları yaradılıb.

Şahmat sinfinə baxış zamanı Ali Məclisin Sədri onlayn şahmat yarışlarına üstünlük verilməsi barədə tapşırıq verib, Naxçıvanda şahmatın tədrisinin nümunə kimi təqdim olunduğunu bildirib.

Sonra məktəbin pedaqoji kollektivi ilə görüş olub.

Naxçıvan Muxtar Respublikasının Təhsil naziri Rəhman Məmmədov çıxış edərək deyib ki, Naxçıvan Muxtar Respublikasının bütün şəhər, qəsəbə və kəndlərində genişmiqyaslı quruculuq işləri aparılır. Kompleks quruculuq tədbirləri zamanı yeni məktəb binalarının inşasına xüsusi diqqət yetirilir, təhsilin inkişafı, innovativ tədris metodlarının tətbiqi sahəsində ardıcıl tədbirlər həyata keçirilir, təhsil müəssisələrinin maddi-tədris bazası möhkəmləndirilir. Bu ilin ötən dövründə 7 ümumtəhsil müəssisəsi yenidən qurularaq istifadəyə verilib. Təhsil infrastrukturunun yaxşılaşdırılması nəticəsində müasir laboratoriyalar, fənn kabinələri, idman zalları, açıq idman qurğuları müəllim və şagirdlərin istifadəsinə verilib. Ümumtəhsil məktəblərində yaradılan müasir tədris şəraiti təhsildə innovasiyaların tətbiqinə geniş imkanlar açıb. Bu günə qədər 53 təhsil müəssisəsində STEAM kabinələri yaradılıb, 50 təhsil müəssisəsində isə kabinələrin yaradılması istiqamətində işlər davam etdirilir. Dırnıs kənd tam orta məktəbinin də maddi-tədris bazası yaxşılaşdırılıb, müasir tədris şəraiti yaradılıb. Son 5 ildə məktəbin 42 məzunundan 30-u, yaxud 71 faizi ali və orta ixtisas təhsili müəssisələrinə qəbul olub, onlardan 5-i 500-700 arası bal toplayıb. Rəhman Məmmədov göstərilən hərtərəfli diqqət və qayğıya görə muxtar respublikanın təhsil işçiləri adından minnətdarlıq edib.

Məktəbin gənc müəllimi Aynur Zəkili Ali Məclisin Sədrinə minnətdarlıq edərək deyib: “1995-ci ildə muxtar respublika rəhbəri seçilərkən təhsil quruculuğunu inkişafın əsas istiqaməti kimi müəyyənləşdirmişdiniz. İndi muxtar respublikamızda təhsilin səviyyəsi göz qabağındadır. Təhsil müəssisələrində müasir tədris şəraiti yaradılıb. Məktəblərimiz kompüter, elektron lövhə, dərslik, bədii ədəbiyyat və digər tədris vəsaitləri ilə təmin olunub. Bu gün Dırnıs kənd tam orta məktəbi də Ali Məclis Sədrinin qayğısı sayəsində müasir məktəblər sırasına qoşulur. Hərtərəfli tədris şəraiti yaradılan məktəb bu gün istifadəmizə verilir. Bu, bütün müəllim, şagird və valideynlər üçün böyük hədiyyədir. Yaradılan müasir tədris şəraiti şagirdlərimizin daha yaxşı təhsil almalarına geniş imkanlar açır”.

Naxçıvan Muxtar Respublikası Ali Məclisinin Sədri Vasif Talıbov Dırnıs kənd tam orta məktəbinin istifadəyə verilməsi münasibətilə kollektivi təbrik edərək deyib: Cəmiyyət təhsilsiz inkişaf edə bilməz. Təhsilin də əsası məktəbdə qoyulur. Ona görə də məktəblər müasir tədrisin tələbləri səviyyəsində qurulmalıdır. Müstəqil ölkəmizin gələcəyinin təminatçısı olan gənclərin yetişdirilməsi üçün onlar yaxşı təhsil almalı, vətənpərvər ruhda böyüməlidir. Gənclər elə yetişdirilməlidir ki, onların nəinki Azərbaycanda, həmçinin istənilən xarici ölkələrdə ali təhsil almaq, peşə öyrənmək imkanları olsun. Ümummilli liderimiz Heydər Əliyev deyirdi ki, “Gənclərimizə yüksək təhsil verməklə bərabər, onları əsl vətəndaş kimi böyütməliyik”. Məktəbdə təhsillə bərabər, gənclərimizi həm də vətənpərvər ruhda böyütməliyik ki, gələcəkdə ölkəsi, cəmiyyət və ailəsi üçün yararlı vətəndaşa çevrilə bilsin. Bu gün Dırnıs kənd tam orta məktəbinin yaxşı müəllim kollektivi formalaşıb. Bu özünü məktəbin son 5 ildəki nəticələrində göstərir. Məktəbi bitirənlərin 71 faizi ali və orta ixtisas məktəblərinə qəbul olunub. Bu da muxtar respublikanın orta göstəricisinə yaxındır.

Ali Məclisin Sədri bu münasibətlə kollektivə təşəkkür edərək deyib: Ölkəmizin gələcəyi müəllim kollektivinin fəaliyyətindən asılıdır. Burada yetişdirilən gənclər ölkənin gələcəyini təmin edəcək, müstəqilliyimizi, dövlətçiliyimizi davam etdirəcəklər. Hər bilikli gənc də ölkənin fəxridir. Harada olmalarından asılı olmayaraq, onlar azərbaycançılıq ideologiyası ilə yaşamalı, Vətənə xidmət haqqında düşünməli, eyni zamanda, özlərinin davranışları ilə nümunə olmalıdırlar. Bunların hamısının əsası isə məktəbdə qoyulur. Yaradılan şərait, eyni zamanda, kollektivin öz işinə məsuliyyətlə yanaşması gələcəkdə bu məktəbin nailiyyətlərinin artmasına imkan verəcəkdir. Bu gün istifadəyə verilən məktəb binası uzun illər istifadə olunmalı, qurulanlar qorunmalıdır.

“Təhsil ocağında tədrisin səviyyəsi yüksəldilməli, məktəbi bitirən hər bir gənc mütləq bir peşəyə yönləndirilməlidir”, - deyən Ali Məclisin Sədri bildirib ki, bunun üçün hər cür şərait yaradılmışdır. Hər bir müəllim yetişdirdiyi gənclərlə ölkənin gələcəyinə xidmət etmiş olur. Ona görə də ölkəmizin gələcəyi naminə hər kəs gənclərin gələcəyə hazırlanması işinə töhfə verməlidir. Məktəb işi bu istiqamətdə xüsusən fərqlənməlidir. Dövlət, məktəb, cəmiyyət birgə fəaliyyət göstərərək ölkənin bu gününü və gələcəyini təmin etməlidir. Bu gün ölkəmizdəki dövlət-xalq birliyi inkişafın təminatçısıdır. Bu yolun da əsası Ümummilli Liderimizin Azərbaycana rəhbərliyi illərində qoyulub. Müasir Dırnıs kəndi bu yolun uğurla davam etdirilməsinə nümunədir.

Ali Məclisin Sədri kollektivə tədrisdə uğurlar arzulayıb.

Binanın həyətində bufet və qazanxana tikilib, açıq idman qurğuları quraşdırılıb, yaşıllıq salınıb.

Dırnıs kənd avtomobil yolu yenidən qurulub

Naxçıvan Muxtar Respublikasında müasir yol-nəqliyyat infrastrukturu daim diqqətdə saxlanılır. Mərkəzlə yanaşı, bölgələrdə də müasir yolların salınması əhalinin təhlükəsizliyini və rahatlığını təmin edir, sosial-iqtisadi inkişafa xidmət göstərir.

Dekabrın 3-də Naxçıvan Muxtar Respublikası Ali Məclisinin Sədri Vasif Talıbov yolda yaradılan şəraitlə tanış olub.

Bildirilib ki, ümumi uzunluğu 5,2 kilometr olan yola asfalt örtük salınıb, 1300 metr beton su kanalı çəkilib, 4 metal su keçidi qoyulub. Həmçinin Ali Məclisin Sədrinə Vənənd-Pəzməri yolunda aparılan yenidənqurma işləri haqqında da məlumat verilib.

Ali Məclisin Sədri Vənənd-Pəzməri avtomobil yolunda işlərin gələn ildən etibarən davam etdirilməsi barədə tapşırıq verib.

Dırnıs kəndində müasir idarəetmə sistemi yaradılıb

Dekabrın 3-də Dırnıs kənd mərkəzi istifadəyə verilib.

Naxçıvan Muxtar Respublikası Ali Məclisinin Sədri Vasif Talıbov binada yerləşən təşkilatların fəaliyyəti və yaradılan şəraitlə maraqlanıb.

Məlumat verilib ki, üçmərtəbəli kənd mərkəzində Dırnıs və Anaqut kəndlərini əhatə edən inzibati ərazi dairəsi üzrə nümayəndəlik, bələdiyyə, rabitə evi, polis sahə və baytarlıq məntəqələri, kitabxana, Yeni Azərbaycan Partiyası ərazi ilk təşkilatı, Mədəniyyət evi, arxiv, statistika otağı, 44 yerlik zal və qazanxana yerləşir. Kitabxana fondunda 9482 kitab vardır. Rabitə evində 384 nömrə tutumlu yeni nəsil ATS quraşdırılıb. Kənddə 176 internet istifadəçisi vardır.

Yeni Azərbaycan Partiyası ərazi ilk təşkilatının 59 üzvü vardır ki, onlardan da 8-i gənc, 32-si isə qadındır. Ərazi ilk təşkilatının sədri Raziyyə Bağırova partiya üzvləri adından yaradılan şəraitə görə minnətdarlıq edərək deyib: “Ali Məclis Sədrinin Dırnıs kəndinə gəlişi sakinlərin sevincinə səbəb olub. Kənddə yeni məktəb, həkim ambulatoriyası, kənd və xidmət mərkəzləri istifadəyə verilib. Bizə hədiyyə edilən quruculuq ünvanlarını qoruyub saxlayacaq, göstərilən etimadı doğruldacağıq”.

İnzibati ərazi dairəsi üzrə nümayəndə əvəzi Cabir Hüseynov deyib: “Dırnıs kənd inzibati ərazi dairəsi üzrə nümayəndəlik Anaqut və Dırnıs kəndlərini əhatə edir. Kənd sakinlərinin məşğuliyyəti meyvəçilik, tərəvəzçilik, heyvandarlıq, arıçılıqdır. Ailə təsərrüfatları dövlət qayğısından istifadə edərək məhsul çeşidlərini artırır, istehsal etdikləri məhsulları rahat şəkildə yarmarka və bazarlarda satırlar. Bununla da onlar öz dolanışıqlarını yaxşılaşdırmaqla yanaşı, məhsul bolluğuna töhfə verirlər”.

Ali Məclisin Sədri iclas zalında maarifləndirici tədbirlərin və görüşlərin keçirilməsi barədə tapşırıqlar verib.

Bildirilib ki, kənddə əsas diqqət yetirilən sahələrdən biri də baytarlıq işinin təşkilidir. Bu gün Ordubad rayonunda epizootik vəziyyət sabitdir. Bunun səbəbi dərman preparatları və digər tibbi avadanlıqlarla təminat, peyvəndləmə və dezinfeksiya tədbirlərinin vaxtında görülməsidir. Aparılan profilaktik tədbirlərin nəticəsidir ki, rayonda bu sahədə heç bir xəstəlik müşahidə olunmur.

Bina istilik, elektrik və su sistemi ilə təchiz olunub, həyətdə abadlıq işləri aparılıb, yaşıllıqlar salınıb.

Dırnıs kəndində əhaliyə nümunəvi tibbi xidmət göstəriləcək

Muxtar respublikada əhalinin sağlamlığı diqqət mərkəzində saxlanılır, yeni səhiyyə ocaqları tikilərək istifadəyə verilir. Son illər kənd yaşayış məntəqələrində tibbi xidmətin keyfiyyətinin yüksəldilməsi sahəsində görülən tədbirlər bu baxımdan mühüm əhəmiyyət daşıyır.

Dekabrın 3-də Dırnıs kəndində həkim ambulatoriyasının açılışı olub.

Naxçıvan Muxtar Respublikası Ali Məclisinin Sədri Vasif Talıbov səhiyyə ocağında yaradılan şəraitlə tanış olub.

Məlumat verilib ki, kənd mərkəzində yerləşən həkim ambulatoriyasında baş həkim, stomatoloq, palata, doğuş, manipulyasiya, peyvənd, qeydiyyat otaqları və aptek vardır. Həkim ambulatoriyası stomatoloji qurğu, doğuş masası, quruducu şkaf, peyvənd və təcili yardım çantaları, mikroskop, sentrifuqa, qlükometr, boyölçən, tərəzi, soyuducu və digər tibbi avadanlıqlarla təmin edilib.

Ambulatoriyanın baş həkimi Əhəd Cəfərli yaradılan şəraitə görə minnətdarlıq edərək deyib: “Əvvəllər uyğunlaşdırılmış binada fəaliyyət göstərirdik. Bu gün isə bizim üçün müasir iş şəraiti yaradılıb. Ambulatoriya 5 kəndə xidmət edir. Çalışacağıq ki, göstərilən etimadı doğruldaq, bundan sonra da əhaliyə daha yaxşı xidmət göstərək”.

Ali Məclisin Sədri peyvənd və patronaj işinin təşkili, eləcə də səhiyyə maarifinə üstünlük verilməsi, rayon mərkəzindən həkim briqadalarının göndərilməsi, bu sahədə broşürlərin hazırlanması barədə tapşırıqlar verib.

Xidmət mərkəzi gündəlik ehtiyacların ödənilməsini təmin edəcək

Həmin gün Naxçıvan Muxtar Respublikası Ali Məclisinin Sədri Vasif Talıbov Dırnıs kəndində xidmət mərkəzinin də açılışını edib.

Məlumat verilib ki, xidmət mərkəzində bərbərxana, qadın gözəllik salonu, ət satışı yeri, ərzaq və təsərrüfat malları mağazaları və anbar yerləşir. Burada xidmətin təşkili üçün nümunəvi şərait yaradılıb, 5 nəfər işlə təmin olunub.

Ali Məclisin Sədri yerli məhsulların satışına üstünlük verilməsi barədə tapşırıqlar verib.

Sonra kənd sakinləri ilə görüş olub.

Naxçıvan Muxtar Respublikası Ali Məclisinin Sədri Vasif Talıbov Dırnıs kəndinin müasir kəndlər sırasına qoşulması münasibətilə sakinləri təbrik edərək deyib: Bu gün Dırnıs kəndinin həyatında əlamətdar gündür. Ona görə ki, yeni sosial obyektlər sakinlərin istifadəsinə verilir, yollar abadlaşıb, infrastruktur yenilənib. Bunlar həm sakinlərə xidmət edəcək, həm də dövlət qurumlarının iş şəraitini yaxşılaşdıracaq. Müasir tələblər səviyyəsində məktəb qurulub ki, buradan da hər bir ailənin övladı istifadə edəcək.

Ali Məclisin Sədri deyib: Kənddə ailə təsərrüfatları formalaşıb, inkişaf edib. Ərazi imkan verir ki, burada heyvandarlıq, arıçılıq, meyvəçilik və bitkiçilik inkişaf etdirilsin. Bütün bunlardan səmərəli istifadə edərək gözəl, səfalı kəndi daha da abadlaşdırmaq lazımdır. Dövlət əhalinin rahatlığı üçün hər cür şərait yaradıb. Bütün bu işlərin görülməsi üçün ölkədə sabitlik, inkişaf və iqtisadi imkanlar olmalıdır. Ümummilli lider Heydər Əliyev siyasətinin davam etdirilməsi, o yola sədaqət bu gün kəndlərimizi, ölkəmizi abadlaşdırmaqla bərabər, ərazi bütövlüyümüzü təmin etdi. Bunların hamısı bugünkü reallıqlardır. Həmin reallıqlar Dırnıs kəndinin timsalında aydın görünür. Bu gün ölkəmizin inkişafı hər kəsdə təəccüb doğurur. Bu da bizim üçün qürurdur. Qısa müddətdə Azərbaycan inkişaf etmiş ölkələr sırasında özünəlayiq yer tutub. Ölkəmiz iqtisadi imkanlarına və təhsilin səviyyəsinə görə ön sıralarda dayanır. Bütün bunlar hamısı nailiyyətdir. Görülən işlər ölkəmizin bu günü ilə yanaşı, eyni zamanda, onun gələcəyini də təmin edəcəkdir. Bütün bunlara dövlət-xalq birliyi nəticəsində nail olunub.

Ali Məclisin Sədri bildirib ki, kənddə torpaqlar əkilməli, heyvandarlıq, maldarlıq, arıçılıq, əkinçilik inkişaf etdirilməli, ailə təsərrüfatları genişlənməlidir. Bütün bunlar əhalinin rahat yaşayışına və ölkəmizin inkişafına xidmət edəcəkdir. Vaxtilə burada məktəblilərin yay düşərgəsi var idi. Bu kəndlərin, ümumiyyətlə, hamısı artıq turistik bölgəyə çevrilir. Bu kəndin də inkişafında görülən işlərin çox böyük nəticəsi olacaq. Davamlı inkişaf üçün yaradılanlar gərək qorunsun. O vaxt məktəbdə 5 kompüter var idisə, bu gün 20 kompüter var. Kənddə internet var. Torpaqlardan səmərəli istifadə etməliyik ki, muxtar respublikamız inkişaf edərək ölkəmizin inkişafına öz töhfəsini verə bilsin. Hər zaman bu ərazi özünün ab-havası ilə, insanların qonaqpərvərliyi ilə diqqət çəkib. Görülən işlərdən sonra qonaqlar daha da çoxalacaq.

Ali Məclisin Sədri sakinlərə firavan həyat, uzun ömür arzulayıb.

Dırnıs kənd sakinləri adından minnətdarlıq edən Rza Allahyarov deyib: “Ali Məclis Sədrinin kəndimizə gəlişi bizə hər zaman sevinc bəxş edir. Mən 1954-1957-ci illərdə Dırnıs kənd məktəbində təhsil almışam. Əvvəllər Pəzməridə, Kələkidə ibtidai, Unusda və Əylisdə natamam orta məktəb var idi, Anaqutda isə məktəb yox idi. Orta məktəb yalnız bu kənddə idi. Ona görə də yuxarı kəndlərdən gəlib burada dərs keçirdik. O vaxt bu məktəbdə 5 sinif, bir müəllimlər otağı, bir kitabxana var idi. Bəzən dərsləri müəllimlər otağında, kitabxanada keçirdik. İndi isə belə möhtəşəm bina bizim istifadəmizə verilib. Bu, dövlət qayğısının əyani ifadəsidir. Bizim də vəzifəmiz bunları qoruyub saxlamaqdır. Kəndarası yollara asfalt salınıb, körpülər tikilib. Bu gün Azərbaycan ən inkişaf etmiş dövlətlər sırasındadır. Ölkəmizin ayrılmaz hissəsi olan Naxçıvan Muxtar Respublikası da inkişafın yeni mərhələsindədir. Dövlətimizin, dövlətçiliyimizin sükanı etibarlı əllərdədir. “Kitabi-Dədə Qorqud” dastanında da yazılır ki, “Torpağı əkmirsənsə, qorumağına, qorumursansa, əkməyinə dəyməz”. Biz də çalışacağıq ki, torpaqlarımızı əkək, bol məhsul götürək”. Rza Allahyarov bildirib ki, Vətən müharibəsi qələbəmizlə başa çatdı. Var olsun Ali Baş Komandanımız, var olsun ordumuz, var olsun Azərbaycan xalqı.

X X X

Dırnıs kəndində yeni sosial obyektlər tikilərkən bir sıra abadlıq işləri də görülüb. Kənddə 830 metr yeni fiber-optik, 1150 metr yeraltı kabel, 1610 metr hava rabitə xətti çəkilib. Həmçinin elektrik təsərrüfatı tamamilə yenilənib, 71 elektrik dirəyi yenisi ilə əvəz edilib, 6500 metr məftil naqil kabel xətti ilə əvəzlənib, 3 güc transformatoru təmir edilib. Bundan başqa, 170 poqonometr polietilen borularla yeni tikililərə qaz xətti çəkilib, 2085 poqonometr qaz xəttində təmir-bərpa işləri aparılıb. Eyni zamanda, kənddə içməli su təminatını yaxşılaşdırmaq məqsədilə 60 metr kaptaj tikilib, 1550 metr məsafədən su xətti çəkilib, paylayıcı içməli su xəttində təmir-bərpa işləri görülüb.