Ötən sutka İtaliyaya dəniz yolu ilə 500-dək miqrant gəlib
Roma, 30 oktyabr, AZƏRTAC
Son sutka ərzində İtaliyanın cənubundakı Lampeduza adasına 500-dək miqrant qəbul edilib.
AZƏRTAC xəbər verir ki, Liviyadan yola düşən 6 qayıqdan ümumilikdə 340 nəfər İtaliya maliyyə polisi və sahil mühafizə xidmətinin patrul gəmiləri tərəfindən xilas olunub. Miqrantların Misir, Banqladeş, Suriya, Sudan, Eritreya, Efiopiya, Mərakeş və Pakistandan olduqları bildirilib. Bundan başqa, adaya kiçik qayıqlarla 27 Tunis vətəndaşı, Eritreya və Misir vətəndaşı olan 104 miqrant gəlib.
Hazırda Lampeduza adasındakı düşərgədə 16-sı valideyn müşayiəti olmayan azyaşlı olmaqla 788 miqrant var. Onlardan 148-i gəmi-bərə ilə Siciliya adasının Porto Empedokl limanına yola salınıb.
Daxili İşlər Nazirliyinin məlumatına görə, cari ilin ötən dövründə İtaliyaya dəniz yolu ilə 142 min 384 miqrant gəlib ki, 2022-ci ildə bu rəqəm 82 min 152 olub.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
