Pakistan hökuməti qanunsuz mühacirlərin deportasiyası planını təsdiqləyib
Bakı, 31 oktyabr, AZƏRTAC
Pakistanın müvəqqəti hökuməti noyabrın 1-dən etibarən ölkədə qanunsuz olaraq yaşayan bütün əcnəbilərin mərhələli şəkildə deportasiyası planını təsdiq edib.
AZƏRTAC “The Express Tribune” qəzetinə istinadla xəbər verir ki, bu barədə Pakistanın informasiya naziri Murtaza Solanqi mətbuat konfransında deyib.
“Onların (qanunsuz miqrantların) ölkədən çıxarılması hökumətin milli təhlükəsizliyi möhkəmləndirmək və qanunsuz miqrasiya ilə mübarizə üzrə tədbirləri çərçivəsində təşkil olunub. Əcnəbilərin deportasiyası Pakistan vətəndaşlarının hüquqlarının müdafiəsinə yönəlib və onların iş yerlərinə əlçatanlığını təmin edəcək”, - deyə nazir bildirib.
Ölkənin daxili işlər naziri Sarfraz Buqti isə öz növbəsində indiyədək 200 min qanunsuz mühacirin könüllü şəkildə Pakistanı tərk etdiyini açıqlayıb.
Qeyd edək ki, hökumətin məlumatına görə, son 40 ildə Əfqanıstandan Pakistana 4 milyondan çox qaçqın gəlib ki, onların da 1,7 milyonunun ölkədə yaşayış üçün sənədi yoxdur.
Bölmənin digər xəbərləri
