Papa Fransisk əməliyyat olunacaq
Vatikan, 7 iyun, AZƏRTAC
Roma Katolik Kilsəsinin rəhbəri Papa Fransisk əməliyyat olunacaq.
AZƏRTAC xəbər verir ki, bu barədə Müqəddəs Taxt-Tacın mətbuat xidməti məlumat yayıb.
Bildirilib ki, Papa Fransiskin üzərində iyunun 7-də günortadan sonra İtaliyanın paytaxtı Romadakı Gemelli xəstəxanasında laparotomiya və qarın divarının protezlə plastik əməliyyatı aparılacaq. O, artıq xəstəxanaya yerləşdirilib və əməliyyatdan sonra daha bir neçə gün tibb müəssisəsində qalacaq.
Papa Fransisk klinik testlər üçün iyunun 6-da Gemelli xəstəxanasında tibbi yoxlamalardan keçib.
Qeyd edək ki, Papa Fransisk artıq üçüncü dəfədir xəstəxanaya yerləşdirilib. O, 2021-ci il iyulun 4-də eyni xəstəxanada yoğun bağırsaq əməliyyatı keçirib və 10 gün müşahidə altında olub. Sonuncu dəfə isə martın 29-da tənəffüs problemlərinə səbəb olan yoluxucu bronxitlə bağlı xəstəxanaya yerləşdirilib və aprelin 1-də evə buraxılıb.
Vatikan
Bölmənin digər xəbərləri
