Parisdə Azərbaycanın Dostları Assosiasiyasının növbədənkənar Baş Assambleyası keçirilmişdir
Paris, 6 may (AZƏRTAC). Parisdə Azərbaycanın Dostları Assosiasiyasının növbədənkənar Baş Assambleyası keçirilmişdir.
Tədbiri açan Azərbaycanın Fransadakı səfir Elçin Əmirbəyov Azərbaycanın Dostları Assosiasiyasının Fransanın Azərbaycanda ilk səfiri olmuş Jan Perrən tərəfindən təsis olunduğunu və uzun illər bu quruma rəhbərlik etdiyini söyləmişdir. O, təşkilatın əsas devizinin hər iki ölkənin xalqlarının daha da yaxınlaşmasına xidmət etdiyini xatırlatmış, bu istiqamətdə müxtəlif layihələr həyata keçirildiyini vurğulamışdır. Səfir son 22 ildə Azərbaycan ilə Fransa arasında əlaqələrin inkişaf etdiyini diqqətə çatdırmışdır.
Diplomat yüksək səviyyəli qarşılıqlı səfərlərin hər iki ölkə arasında müxtəlif sahələrdə əlaqələrin inkişafında xüsusi rol oynadığını vurğulamışdır. O, ölkəmizin zəngin tarixi və mədəniyyəti barədə fransızların ətraflı məlumat əldə etmələri məqsədilə Heydər Əliyev Fondunun təşkilatçılığı və səfirliyin dəstəyi ilə Fransanın bir çox bölgələrində və şəhərlərində keçirilən “Qafqazın mirvarisi olan Azərbaycanın mədəni dəyərləri” layihəsinin iki ölkə arasında mədəni sahədə əlaqələrin inkişafında mühüm hadisə olduğunu bildirmişdir.
E. Əmirbəyov təkcə fransalı siyasətçilərin deyil, bir çox sənət adamlarının da ölkələrimiz arasında əlaqələrin inkişafına, iki xalqın yaxınlaşmasına xüsusi töhfə verdiyini, Xocalı faciəsinə həsr olunan musiqi əsərinin buna misal olduğunu bildirmişdir.
Azərbaycan ilə Fransa arasında əməkdaşlığın daha da inkişafında çox iş görməyin vacibliyini vurğulayan səfir Azərbaycanın Dostları Assosiasiyasının bu istiqamətdə qarşısında mühüm vəzifələr durduğunu diqqətə çatdırmışdır.
Assosiasiyanın təsisçisi və sədri, Fransanın Azərbaycandakı ilk səfiri Jan Perrən Azərbaycanı dünya ictimaiyyətinə, o cümlədən fransız xalqına yaxından tanıtmaq məqsədilə 1998-ci ildə bu qurumun yaradıldığını xatırlatmışdır. O, ərazisinin 20 faizinin işğal edilməsinə və bir milyondan artıq qaçqın və məcburi köçkünü olmasına baxmayaraq, bu gün Azərbaycanın dinamik inkişaf etdiyini, ənənəvi mədəni zənginliyə malik ölkəmizin orijinallığını saxlamaqla müasirlik istiqamətində quruculuq işləri apardığını, Heydər Əliyev Fondunun təşəbbüsü ilə Fransada və digər ölkələrdə arxeoloji abidələrin bərpa edildiyini bildirmişdir.
İki ölkə arasında əlaqələrə toxunan Milli Assambleyanın deputatı Jan-Fransua Mansel Assosiasiyasının 16 il ərzində Azərbaycan və fransız xalqlarının yaxınlaşmasına öz töhfəsini verdiyini qeyd etmiş, siyasi, iqtisadi və mədəni əlaqələr istiqamətində iki ölkə arasında əməkdaşlığın vacibliyini vurğulamışdır.
Senatın Fransa-Qafqaz Dostluq Qrupunun sədr müavini, senator Natali Qule çıxışında Azərbaycanın apardığı uğurlu daxili və xarici siyasət sayəsində Cənubi Qafqaz bölgəsində lider dövlətə çevrildiyini, beynəlxalq aləmdə nüfuzunun artdığını bildirmiş, ölkələrimiz arasında əməkdaşlığın daha da möhkəmlənməsi üçün müxtəlif layihələrin reallaşdırılmasının əhəmiyyətini vurğulamışdır.
Fransa Senatının keçmiş sədri Kristian Ponsele 1991-ci ildə müstəqilliyini bərpa edən Azərbaycanda sivil dövlət yarandığını və bu ölkənin Avropaya müvəffəqiyyətlə inteqrasiya etdiyini bildirmişdir.
Burqundiya regionunun Yon vilayətinin prezidenti Andre Vilye, Parisin Vll rayonunun meri xanım Raşida Dati, senator Jan-Mari Bokel dünyəvi dövlət olan Azərbaycan ilə Fransa arasında əməkdaşlığın inkişafında hər iki ölkənin regionlarının əlaqələr qurmasının vacibliyini vurğulamışlar.
Fransalı bəstəkar, “Xocalı-613” əsərinin müəllifi Pyer Tilloy ölkəmizə səfərinin onda xoş təəssürat yaratdığını bildirmiş, tanınmış aktyor Pober Osseyn və Fransa Yəhudi Təşkilatlarının Əlaqələndirmə Şurasının sədri Jan-Pyer Allali Azərbaycanın tolerantlıq nümunəsi olduğunu, ölkədə heç bir ayrı-seçkiliyə yol verilmədiyini, etnik qrupların dilinə, dininə və mədəniyyətinə hörmətlə yanaşıldığını, məscidlərlə yanaşı, kilsə, sinaqoqların fəaliyyət göstərdiyini diqqətə çatdırmışlar.
Azərbaycanın Dostları Assosiasiyasının növbədənkənar Baş Assambleyasında Jan Perrən Assosiasiyasının fəxri prezidenti, Jan-Fransua Mansel isə açıq səsvermə yolu ilə yekdilliklə qurumun yeni sədri seçilmişdir. Senator Natali Qule, Burqundiya regionunun Yon vilayətinin prezidenti Andre Vilye və senator Jan-Mari Bokel Assosiasiyanın sədr müavinləri seçilmişlər. Baş Assambleyada, həmçinin Assosiasiyanın İcra Şurasının yeni tərkibi və təşkilatın yeni nizamnaməsi təsdiq edilmişdir.
Sonda Azərbaycanın Dostları Assosiasiyasının fəaliyyət planının qəbul edilməsi məqsədilə yaxın zamanlarda İcra Şurasının yeni tərkibdə iclasının keçirilməsi qərara alınmışdır.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
