Parisdə UNESKO-nun Hökumətlərarası Okeanoqrafiya Komissiyasının sessiyası keçirilib
Bakı, 4 iyul, AZƏRTAC
İyunun 26-dan iyulun 4-dək Parisdə UNESKO-nun Hökumətlərarası Okeanoqrafiya Komissiyasının 30-cu sessiyası keçirilib. AZƏRTAC komissiyanın saytına istinadla xəbər verir ki, dünyanın 150 ölkəsinin, o cümlədən Azərbaycanın üzv olduğu bu təşkilatın komitə iclaslarında okeanlar və dənizlərdə ekologiya, naviqasiya, su hövzələrinin təbii ehtiyatlarının qorunması, iqlim dəyişiklikləri və s. məsələlər üzrə elmi məruzələr təqdim olunub.
Komissiyanın İcraiyyə Komitəsi UNESKO-nun 40-cı Baş Konfransına təqdim etmək üçün fəaliyyət planını təsdiq edib.
Sessiyanın son günü UNESKO-nun Hökumətlərarası Okeanoqrafiya Komissiyasının İcraiyyə Komitəsinin 40 nəfərdən ibarət üzvləri seçilib. Onların arasında Türkiyənin adı da var. Türkiyə Xarici İşlər Nazirliyi bununla bağlı iyulun 4-də məlumat yayıb.
Azərbaycan 1998-ci ilin yanvarından UNESKO-nun Hökumətlərarası Okeanoqrafiya Komissiyasının üzvüdür.
Bölmənin digər xəbərləri
