Parlamentdə “Sosial xidmət haqqında” Qanunla bağlı “dəyirmi masa” keçirilib
Bakı, 18 may, AZƏRTAC
Mayın 18-də Milli Məclisdə əmək və sosial siyasət komitəsinin təşkilatçılığı ilə “Azərbaycanda sosial xidmət sisteminin hüquqi, iqtisadi və təşkilati əsasları” mövzusunda “dəyirmi masa” keçirilib.
AZƏRTAC xəbər verir ki, tədbirdə çıxış edən komitə sədri Hadi Rəcəbli “Sosial xidmət haqqında” Qanunun icrası barədə danışıb. Bildirib ki, Azərbaycanda bu sistem getdikcə təkmilləşir. Qeyd olunub ki, ölkə Prezidenti İlham Əliyev “Sosial xidmət haqqında” 2011-ci il 30 dekabr tarixli qanunun tətbiqi ilə əlaqədar Fərman imzalayıb. Fərmanda qanunun tətbiqi ilə əlaqədar ayrı-ayrı məsələlərin həlli il bağlı Nazirlər Kabinetinə tapşırıqlar verilib. Hazırda ölkədə “Sosial xidmət haqqında” qanuna əsasən- çətin həyat şəraitində yaşayan şəxsin sosial problemlərinin aradan qaldırılması və ictimai həyatda digər insanlarla bərabər iştirak imkanlarının yaradılması istiqamətində kompleks tədbirlər həyata keçirilir. Qeyd olunub ki, bu sahə üzrə həyata keçirilən layihələrin icrasına bələdiyyələr, QHT-lər, hətta Qızıl Aypara Cəmiyyəti də cəlb edilə bilər.
İclasda iştirak edən əmək və əhalinin sosial müdafiəsi nazirinin müavini İlqar Rəhimov “Azərbaycanda mövcud sosial xidmətlərin institusional mexanizmləri” mövzusunda çıxışında vurğulayıb ki, artıq Azərbaycanda sosial xidmət sahəsində böyük islahatlar aparılır, bu sahə üzrə yeni istiqamətlər yaradılır. Buna görə də vətəndaş cəmiyyətinin bu sahəyə cəlbi, hüquqi bazanın təkmilləşdirilməsi çox zəruridir. Nazir müavini bu gün ölkədə uşaqlar üçün Peşə Reabilitasiya Mərkəzi fəaliyyət göstərdiyini deyib. Qeyd olunub ki, indiyədək burada 800 nəfər 10 peşə istiqamətində hazırlığa cəlb olunub, 678 nəfər sertifikat əldə edib. Nazirliyin nəzdində ahıl şəxslər üçün pansionat fəaliyyət göstərir ki, orada 300 ahıl şəxsə xidmət göstərilir. Evlərdə sosial xidmət aparmaq üçün bu sahədə fəaliyyət göstərənlərin sayı 12 mindən çoxdur.
Sonra tədbirdə Milli Məclisin sosial qanunvericilik şöbəsinin sektor müdiri Adil Vəliyev sosial xidmət sahəsinin modernləşməsində bu qanunun rolundan danışıb. Qeyd olunub ki, bu qanun ölkəmizdə çox vacib olan bir sferanın - çətin həyat şəraitində yaşayanların sosial müdafiəsinin fundamental prinsiplərini özündə ehtiva edən sənəddir. Burada ən çox qayğıya ehtiyacı olan təbəqənin - ahıl və əlillərin, sağlamlıq imkanları məhdud, valideyn himayəsindən məhrum olan və ya valideynlərini itirən uşaqların, yetkinlik yaşına çatmayan baxımsızların, əqli cəhətdən qüsurlu olanların, özünə qulluq etmək imkanı olmayan şəxslərin sosial xidmət ehtiyacları öyrənilir və yardım edilir. Bildirilib ki, qanunun qəbulundan sonra ölkəmizdə sosial xidmətə ehtiyacı olan insanların cəmiyyətə adaptasiyası və inteqrasiyası, onlara baxan şəxslərin maarifləndirilməsi üçün bütün imkanlardan istifadə edilir.
Tədbirdə Sosial iş üzrə beynəlxalq ekspert Herbert Paulichin, Əmək və Əhalinin Sosial Müdafiəsi Nazirliyinin idarə rəisi Fuad Hüseynov, UAFA-nın əməkdaşları Elmir Valehli və Züleyxa Nəcəfova bu sahədəki yeniliklərdən, görülmüş işlərdən söhbət açıblar.
Toplantının sonunda “Sosial işçinin bir günü” adlı videoçarx nümayiş etdirilib.
Bölmənin digər xəbərləri
