PARLAMENTLƏRARASI ƏLAQƏLƏRİN İNKİŞAFINA DAİR İŞÇİ QRUPUNUN İKİNCİ İCLASI VAŞİNQTONDA KEÇİRİLƏCƏK
Milli Məclis sədrinin müavini, Azərbaycan tərəfindən işçi qrupunun həmsədri Ziyafət Əsgərov AZƏRTAC-ın müxbirinə demişdir ki, razılaşmaya əsasən bu ilin may ayında qrupun digər həmsədri, Amerika Birləşmiş Ştatları Konqresinin Silahlı Qüvvələr komitəsinin sədri Kurt Ueldon Bakıda olmuşdur. Ueldon və onunla gələn konqresmenlərlə aparılan danışıqlar zamanı Azərbaycan parlament nümayəndə heyətinin bu ilin sonunda Vaşinqtona səfəri barədə razılıq əldə olunmuşdur. Vaşinqtona səfər zamanı deputatlarımız və konqresmenlər, memorandumda nəzərdə tutulmuş təhlükəsizlik və müdafiə, maliyyə, kredit, bank, kənd təsərrüfatı, insan hüquqları, elm-təhsil, texnologiya məsələləri ilə bağlı 6 köməkçi komitənin yaradılması məsələsini də müzakirə edəcəklər. Azərbaycan tərəfi artıq bu komitələrin yaradılmasına razılıq vermişdir və çox güman ki, ilin sonunadək qarşı tərəf də məsələni müsbət həll edəcəkdir.
Bölmənin digər xəbərləri
