PAYTAXTIN RAYONLARINDA KƏND TƏSƏRRÜFATI MƏHSULLARININ NÖVBƏTİ SATIŞ-YARMARKALARI KEÇİRİLMİŞDİR
AZƏRTAC xəbər verir ki, avqustun 18-də Bakı şəhərinin 7 rayonunda əvvəlcədən müəyyən olunmuş yerlərdə 
kənd təsərrüfatı məhsullarının növbəti satış-yarmarkaları keçirilmişdir. Alıcılara 500 tona yaxın məhsul təklif olunmuşdur.
Nəsimi rayonunda yerləşən “Təzə bazar” MMC-nin həyətindəki yarmarkada satışa Sabirabad, Hacıqabul, Salyan, Gədəbəy və Tovuz rayonlarından 100 tondan çox meyvə-tərəvəz, ət, bostan və süd məhsulları çıxarılmışdı. Bu məhsullar bazarlardakı ilə müqayisədə 20-25 faiz ucuz qiymətə satılırdı. Kənd Təsərrüfatı Nazirliyinin, Nəsimi Rayon İcra Hakimiyyətinin nümayəndələri, “Təzə bazar” MMC-nin rəhbərliyi, məhsulların gətirildiyi rayonların təmsilçiləri satışa nəzarət edir, alıcıların arzu və təkliflərini dinləyir, onların rəyləri ilə maraqlanırdılar.
Suraxanıda - “Günəş” ticarət mərkəzindəki yarmarkada sakinlərə Samux, Şəki və Qobustan rayonlarından gətirilmiş 30 tondan çox meyvə-tərəvəz və ət məhsulları təklif olunurdu. “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkaya isə cəlilabadlı fermerlər 5 tondan çox keyfiyyətli meyvə-tərəvəz gətirmişdilər.
Metronun “İnşaatçılar” stansiyasının yaxınlığındakı yarmarkada paytaxt sakinlərinə Qusar, Salyan, Dəvəçi rayonlarından becərilmiş 15 ton bostan məhsulu, 20 ton tərəvəz, 6 ton meyvə, 6 ton kartof, 1 ton ət təklif olunurdu.
Yarmarkaya ilk dəfə gəlmiş salyanlı Salman Vəliyev bildirdi ki, həyətyanı torpağında yetişdirdiyi 300 kiloqram üzümü satışa çıxarmış və qısa müddət ərzində məhsulunu satmışdır. Alıcılardan Gülağa Qasımov, Ağaverdi Həşimov, Sona Rzayeva və başqaları meyvə-tərəvəzin, digər məhsullarin keyfiyyətindən və qiymətindən razılıq edirdilər.
Səbail rayonunun Badamdar qəsəbəsindəki yarmarkada Ağdaş, Salyan, Ucar, Sabirabad, Biləsuvar və Masallı rayonlarından gətirilmiş 26 ton müxtəlif çeşidli kənd təsərrüfatı məhsulu alıcıların ixtiyarına verilmişdi. Rayon icra hakimiyyətinin və Kənd Təsərrüfatı Nazirliyinin əməkdaşları məhsulların keyfiyyət və qiymətinə nəzarət edirdilər.
Nərimanov rayonundakı Keşlə Ticarət Mərkəzində təşkil olunmuş yarmarkada Xaçmaz, İmişli, Tovuz, Astara, Salyan, Neftçala və Qobustan rayonlarının fermerləri satışa 33,1 ton ət, balıq, ağartı, konserv məhsulları, tərəvəz, meyvə, kartof çıxarmışdılar. Bu məhsulların böyük əksəriyyəti - 22 tonu Xaçmaz fermerlərinin payına düşür. Yarmarkada Hövsan broyler fabrikinin nümayəndələri alıcılara 25 min ədəddən çox yumurta təklif edirdilər.
Regionların sosial-iqtisadi inkişafı Dövlət Proqramının tələblərinə uyğun keçirilən belə tədbirlər əhalinin sosial rifahını yaxşılaşdırmaq məqsədi daşıyır və bazarlarda qiymətlərin süni surətdə qaldırılmasının qarşısını alır.
Bölmənin digər xəbərləri
