Perunun “El Peruano” qəzetində Qanlı Yanvar hadisələrindən bəhs edən məqalə dərc olunub
Bakı, 22 yanvar, AZƏRTAC
Perunun nüfuzlu “El Peruano” qəzetində Azərbaycanda törədilən Qanlı Yanvar hadisələrindən bəhs edən məqalə dərc olunub.
Azərbaycanın Meksikada səfirliyindən AZƏRTAC-a bildiriblər ki, 1990-cı ilin Qanlı Yanvar faciəsinin 28 illiyinə həsr olunmuş məqalədə 20 yanvarın Azərbaycan xalqının müasir tarixinin ən faciəvi və eyni zamanda qürurverici günlərdən biri olduğu deyilir.
Məqalədə sovet qoşunlarının Bakıya yeridilərək, dinc əhaliyə qarşı törətdiyi cinayətlərdən bəhs edilir. Həmin gün yüzdən çox həmvətənlimizin amansızcasına qətlə yetirildiyi, yüzlərlə insanın yaralandığı, onların arasında yaşlı, qadın, uşaqların olduğu bildirilir. Azərbaycan xalqının müstəqillik mübarizəsi və nümayiş etdirdiyi qəhrəmanlıqlar barədə oxuculara məlumat verilir.
Yazıda 20 Yanvar hadisələrinin Azərbaycan tarixində dönüş nöqtəsi olduğu bildirilir, qəddar imperiyanın təzyiqləri və bütün çətinliklərə baxmayaraq, Azərbaycan xalqının suverenliyi uğrunda əzmlə mübarizə apardığını və nəticədə 1991-ci ildə öz müstəqilliyinə yenidən qovuşduğu vurğulanır.
Azərbaycan xalqının öz qəhrəmanlarının xatirəsini anmaq üçün hər il yanvarın 20-də Şəhidlər xiyabanını ziyarət etdiyi bildirilir.
Bölmənin digər xəbərləri
