Peşəkar Futbol Liqası Birinci Divizionun medalçılarını mükafatlandırıb
Bakı, 16 iyul, AZƏRTAC
Peşəkar Futbol Liqasında (PFL) Birinci Divizionun 2019-2020-ci il mövsümünün medalçıları mükafatlandırılıb.
AZƏRTAC PFL-in saytına istinadla xəbər verir ki, COVID-19 pandemiyasına görə kütləvi keçirilməyən tədbirdə əvvəlcə “Zaqatala” futbol klubunun prezidenti Musa Qurbanova bürünc medallar təqdim olunub.
Daha sonra gümüş mükafatçı, klubun idman direktoru Fərəc Əliyev və baş məşqçisi Mirbağır İsayevlə təmsil olunan “Səbail-2” medallarına qovuşub.
Tədbirdə çempion “Turan Tovuz”u klubun Müşahidə Şurasının sədri Oqtay Abdullayev, baş məşqçi İlham Yadullayev və komandanın vitse-kapitanı Aqşin Muxtaroğlu təmsil ediblər. Qızıl medallar və kubok kapitana təqdim edilib.
Qeyd edək ki, futbolçuların medalları komandaların rəhbərliyi tərəfindən oyunçulara veriləcək.
Bölmənin digər xəbərləri
