Praqada mətbuat nümayəndələri üçün Azərbaycan haqqında təqdimat
Praqa, 6 mart, AZƏRTAC
Martın 6-da Azərbaycanın Çexiyadakı səfirliyinin dəstəyi ilə Azərbaycan-Avropa Ticarət Palatası tərəfindən Praqanın “President” hotelində ölkəmiz haqqında təqdimat təşkil olunub.
AZƏRTAC xəbər verir ki, Çexiyanın mətbuat nümayəndələri üçün keçirilən təqdimatda Azərbaycanın turizm imkanları, tarixi, mədəniyyəti, iqtisadiyyatı, regiondakı rolu, eləcə də Bakı şəhərinin “Ekspo-2025” Ümumdünya Sərgisinə namizədliyi haqqında məlumat verilib.
Azərbaycanın Çexiyadakı səfiri Fərid Şəfiyev tədbirdə ölkəmizin xarici siyasəti, regionda həyata keçirdiyi beynəlxalq layihələr, Azərbaycan-Çexiya münasibətləri, həmçinin “Ekspo-2025” Ümumdünya Sərgisinə Bakı şəhərinin namizədliyi haqqında təqdimatla çıxış edib.
Daha sonra Karl Universitetinin Xəzər və Azərbaycan üzrə Araşdırmalar Mərkəzinin rəhbəri, professor Eduard Qombar ölkəmizin zəngin tarixi və mədəniyyəti haqqında ətraflı məlumat verib.
Azərbaycan-Avropa Ticarət Palatasının rəhbəri David Snaşel isə Azərbaycan-Çexiya biznes əlaqələrinin mövcud vəziyyəti və perspektivləri barədə söz açıb. Çexiyanın “Tatra” və Azərbaycanın Gəncə avtomobil zavodunun birgə əməkdaşlığını ölkələrimiz arasındakı iqtisadi və biznes əlaqələrinin uğurlu inkişafının bir nümunəsi olduğunu deyən D.Snaşel Çexiyanın bir sıra şirkətlərinin Azərbaycanda infrastruktur və logistika layihələrində də uğurla iştirak etdiyini xatırladıb.
Daha sonra yerli jurnalistlər tərəfindən ölkəmizlə bağlı verilən suallar cavablandırılıb.
Sonda iştirakçılar Azərbaycan mətbəxinin təamlarından dadıblar.
Tədbirdə jurnalistlərlə yanaşı, Praqanın Karl Universitetinin regionumuza maraq göstərən tələbələri də iştirak ediblər.
Pərvanə Qarayeva
AZƏRTAC-ın xüsusi müxbiri
Praqa
Bölmənin digər xəbərləri
