Praqalılar 1945-ci il mayın 5-də baş vermiş üsyanın ildönümünə hazırlaşırlar
Praqa, 1 may, AZƏRTAC
Mayın 5-də, 80 il əvvəl 1945-ci ildə Praqa üsyanı zamanı ilk barrikadanın qurulduğu Milli Teatrda həmin günlərin hadisələrinə həsr olunmuş tədbir keçiriləcək. 1945-ci il mayın 5-də günorta saatlarında çexlər Milli Teatr binasının qarşısında ilk barrikadaları qurmuşdular.
AZƏRTAC xəbər verir ki, gələn bazar ertəsi tarixi teatr binası ilə “Slaviya” kafesi arasında İkinci Dünya Müharibəsinin sonlarında baş vermiş dramatik hadisələri simvolizə edən rəmzi barrikada yaradılacaq. Tədbirdə Praqanın meri Boquslav Svoboda və ictimai xadimlər çıxış edəcəklər.
Axşam saatlarında “Musteq - Soslovnıy Teatrı - Jelezna küçəsi - Staromestskaya ratuşa” marşrutu üzrə yürüş təşkil olunacaq, sonra proqram Praqa Şəhər Muzeyində davam etdiriləcək.
Milli Teatrın qarşısındakı meydanda saat 17:00-da əlavə tədbir proqramına start veriləcək.
Vaçlav Qavel meydanında “Protektorat əsarətində Milli Teatr” adlı geniş sərgi təşkil olunacaq. Gün ərzində burada məktəblilər üçün maarifləndirici proqram da keçiriləcək.
İkinci dünya müharibəsinin başa çatmasının ildönümü münasibətilə sərginin müəllifləri ilə iki ekskursiya da keçiriləcək. Burada Çexiyanın Milli Texniki Muzeyinin eksponatları, o cümlədən işğal dövründə Çexoslovakiya hökumətinin baş naziri olmuş general Aloiz Eliyaşın idarə etdiyi “Z-5 Express” minik avtomobili və “Silver A” müqavimət qrupunun paraşütçüləri üçün həlledici rol oynamış “Libuşe” radiostansiyası nümayiş olunacaq.
Vüqar Seyidov
AZƏRTAC-ın xüsusi müxbiri
Praqa
Bölmənin digər xəbərləri
