Prezident İlham Əliyevin İrəvan mesajları beynəlxalq ictimaiyyətin diqqət mərkəzindədir - Ekspert rəyi
Bakı, 8 may, AZƏRTAC
Prezident İlham Əliyevin Ermənistan paytaxtında keçirilən "Avropa Siyasi Birliyi"nin 8-ci Zirvə toplantısında videobağlantı formatında çıxışı ümumilikdə tədbirin əsas məqamlarından birinə çevrildi. Bu çıxış Cənubi Qafqazda sülh və əməkdaşlıq mövzusunu sammitin gündəliyinə çevirə bildi. Regionun nikbin gələcəyinin formalaşması prosesində Azərbaycanın rolunu nümayiş etdirdi. Bu baxımdan, Prezident İlham Əliyevin sammitdəki nitqi həm Azərbaycanın mövqeyinin ifadəsi, həm də postmünaqişə dövründə Cənubi Qafqazda formalaşan yeni reallıqların beynəlxalq auditoriyaya təqdimatı oldu.
Bu sözləri AZƏRTAC-a açıqlamasında Mətbuat Şurası İdarə Heyətinin üzvü, media eksperti Müşfiq Ələsgərli söyləyib.
"Prezident İlham Əliyevin nitqində verilən mesajlar göstərdi ki, Azərbaycan artıq müharibə mərhələsini arxada qoyaraq, regionda sülh, əməkdaşlıq və iqtisadi inteqrasiya gündəliyini ön plana çıxarır. Bu kontekstdə sammitin Ermənistanda keçirilməsinə Azərbaycanın verdiyi dəstək xüsusi qeyd edildi. Tranzit məhdudiyyətlərinin aradan qaldırılması, Ermənistan ərazisinə Azərbaycan üzərindən yüklərin daşınması, hətta Azərbaycanın Ermənistana yanacaq ixrac etməsi kimi faktlar sadalandı. Azərbaycanla Ermənistan arasında qarşılıqlı anlaşma addımlarının nəticəsi olaraq, sülh prosesinin artıq real nəticələr verdiyi bildirildi.
Vaşinqtonda imzalanmış Birgə Bəyannamənin regionda yeni mərhələnin əsasını qoyması faktının xüsusi vurğulanması da təsadüfi xarakter daşımır. Prezident İlham Əliyev öz çıxışında “Trampın Beynəlxalq Sülh və Rifah Marşrutu”nu Orta Dəhlizin mühüm elementi kimi təqdim etdi. Cənubi Qafqazın gələcəkdə Avropa ilə Asiya arasında strateji bağlantı məkanına çevriləcəyini vurğuladı. Bu qeyd Azərbaycanın geoiqtisadi rolunu, ölkəmizin beynəlxalq tranzit və logistika mərkəzi kimi mövqeyinin gücləndiyini Avropa liderlərinin diqqətinə çatdırdı", - deyə M.Ələsgərli vurğulayıb.
Ekspert bildirib ki, Prezident İlham Əliyevin çıxışında diqqət çəkən digər mühüm istiqamət Avropa təsisatlarına münasibətlə bağlı oldu. Dövlətimizin başçısı Avropa Parlamenti və Avropa Şurası Parlament Assambleyasının Azərbaycana münasibətdə ikili standartlar tətbiq etdiyini bildirdi. O, Azərbaycanın öz ərazi bütövlüyünü təmin etməsinin bəzi Avropa dairələrində qərəzli yanaşma ilə qarşılandığını qeyd etdi. Prezidentin bu çıxışı Azərbaycanın beynəlxalq platformalarda daha sərt və prinsipial diplomatik xətt yürüdəcəyini, ölkənin milli maraqlarının beynəlxalq platformalarda müdafiə ediləcəyini göstərirdi.
"Sammit iştirakçılarının reaksiyaları göstərdi ki, Prezident İlham Əliyevin verdiyi mesajlar beynəlxalq auditoriya tərəfindən diqqətlə qarşılanıb. Avropa İttifaqı Şurasının prezidenti Antonio Koşta Ermənistan və Azərbaycan arasında əldə olunan razılaşmanı ümumilikdə “Avropada sülh hekayəsi” adlandırdı. Ukrayna Prezidenti Volodimir Zelenskinin, Kanadanın Baş naziri Mark Karninin və digər liderlərin öz çıxışlarında Azərbaycan-Ermənistan sülhünü xüsusi vurğulamaları göstərdi ki, beynəlxalq ictimaiyyət Azərbaycan Prezidentinin verdiyi mesajlara xüsusi həssaslıqla yanaşır", - deyə o əlavə edib.
Bölmənin digər xəbərləri
