Bakı, 17 oktyabr, AZƏRTAC

Oktyabrın 15-i Azərbaycan tarixində xüsusi əhəmiyyətə malik bir gündür. 2003-cü ilin oktyabrında xalqın dəstəyi, seçicilərin mütləq səs çoxluğu ilə Azərbaycan Prezidenti seçilən İlham Əliyev 20 il sonra Xankəndi şəhərindən Azərbaycanın suverenliyinin tam şəkildə bərpa olunduğunu bütün dünyaya bəyan etdi. İyirmi il əvvəl andiçmə mərasimi zamanı xalqına verdiyi sözə əməl edən Prezident Azərbaycan tarixinə qalib, Müzəffər Ali Baş Komandan kimi öz adını qızıl hərflərlə həkk edib.

Bu fikirləri AZƏRTAC-a açıqlamasında Milli Məclisin deputatı Ağalar Vəliyev deyib.

Deputat bildirib ki, hazırda müasir tariximizin ən şərəfli və ən qürurlu günlərindən birini yaşayırıq. Antiterror tədbirlərindən sonra separatçı xuntanın diz çökərək təslim olması, Azərbaycan qanunlarını pozaraq qeyri-qanuni fəaliyyət göstərmiş, özünü hansısa qondarma qurumun “prezidenti” adlandıran şəxslərin, canilərin saxlanılaraq Bakıya gətirilməsi və nəhayət Xankəndi şəhərinin mərkəzi meydanında Azərbaycan Bayrağının qaldırılması XXI əsrdə Azərbaycanın gücünü, qüdrətini və beynəlxalq münasibətlər sistemindəki yerini müəyyənləşdirir.

İyirmi il əvvəl Azərbaycan xalqının və Azərbaycan dövlətinin milli maraqlarını müdafiə edəcəyini və Azərbaycanın ərazi bütövlüyünü qoruyacağını bəyan edən Prezident İlham Əliyev ötən dövrdə fəaliyyətinin hər günündə, hər saatında milli mənafenin keşiyində dayanıb.

“Azərbaycan xalqı bu 20 ildə hər gün, hər saat öz müqəddəs məqsədinə doğru gedirdi. Prezident İlham Əliyev Azərbaycanın bir nömrəli və ümummilli problemi olan Qarabağ məsələsinin həlli uğrunda yorulmadan və milli maraqlardan bir addım geri çəkilmədən mübarizə apardı.

Tarixi Qarabağ zəfərinə gedən yolda Prezident İlham Əliyev dövlətin siyasi-iqtisadi dayaqlarını daha da möhkəmləndirirdi. Nəhayət, Vətən müharibəsi Azərbaycan xalqının öz Liderinin rəhbərliyi ilə torpaqlarının azadlığı uğrunda mübarizəsinə çevrildi", - deyən A.Vəliyev qeyd edib ki, Prezident İlham Əliyev ötən 20 ildə modern cəmiyyətdə qətiyyətli Lider, vətənpərvər dövlət başçısı, beynəlxalq münasibətlər sisteminin ən incə komponentlərini belə ölkəsinin maraqlarına istiqamətləndirən rəhbər nümunəsini təqdim etdi.

Dövlətimizin başçısı dəyişən qlobal və regional reallıqlar şəraitində ölkənin milli-strateji maraqlarını qoruya bilmək qabiliyyəti ilə özünün əsl siyasi lider olduğunu bütün dünyaya nümayiş etdirib. Məhz Prezident İlham Əliyevin uğurla yürütdüyü siyasət nəticəsində çoxəsrlik tarixində Azərbaycan heç vaxt indiki qədər güclü olmayıb. Bu gün dünyanın bütün ali tribunalarından öz mövqeyini sərbəst şəkildə ifadə edən, beynəlxalq aləmdə xüsusi hörmətə, nüfuza və imicə malik Azərbaycan bu hörməti öz addımları ilə qazandı.

İnsan hüquq və azadlıqlarına verdiyi dəyər, bütün qərarlarında beynəlxalq hüquqa və beynəlxalq konvensiyalara istinad etməsi, regional layihələrin reallaşmasındakı fəal iştirakı, qlobal təşəbbüskarlığı Azərbaycanın şöhrətini ildən-ilə artırıb. Bu gün Azərbaycanla hesablaşırlar. Azərbaycan dünya miqyasında özünə layiq yerini tuta bilib. Ölkəmizin mövqeyi, dövlətimizin addımları nəinki bölgədə, daha böyük coğrafiyada böyük məna daşıyır.

Vurğulanıb ki, Prezident İlham Əliyev ötən illər ərzində Ermənistan-Azərbaycan münaqişəsini həll etmək üçün güclü siyasi və hüquqi zəmin yaradıb. Dünyanın aparıcı beynəlxalq təşkilatlarının illik toplantılarında, zirvə görüşlərində, sammitlərdə yekun sənəd olaraq qəbul edilən hər bir protokolda Ermənistanın işğalçı dövlət olması xüsusi olaraq yer aldı. Fərqli beynəlxalq təşkilatların verdikləri bəyanatlar, imzaladıqları qətnamələr Azərbaycanın siyasi üstünlüyünü daha da artırdı - artıq bütün dünya Azərbaycanın haqlı mövqeyini açıq kontekstdə dəstəklədi.

Ötən 20 ildə Azərbaycan bütün ölkə və təşkilatlara münasibətdə vahid mövqedən çıxış edib, dostluq və tərəfdaşlıq münasibətlərini hansısa geostrateji təsirə məruz qalmadan müəyyənləşdirib, ikitərəfli və çoxtərəfli münasibətlərdə, dünya siyasətində fəal təmsilçilikdə ali geosiyasi iradəsini nümayiş etdirib.

A.Vəliyev bildirib ki, ötən dövr ərzində ölkəmizdə güclü iqtisadiyyat yarandı. Prezident İlham Əliyev tarixi müraciətində bildirdi ki, bizim iqtisadiyyatımız dörd dəfədən çox artıb. Əsl müstəqilliyə nail olmaq üçün güclü iqtisadiyyatın və ordun olmalıdır. Bəli, sosial dövlət olan Azərbaycanın əldə etdiyi uğurların təməlində düzgün istiqamətləndirilmiş və dayanıqlı iqtisadi siyasət dayanır. Dövlətimizin başçısı hər zaman bildirib ki, ancaq iqtisadiyyatı güclü olan ölkələr müstəqil siyasət apara bilərlər. Bu dövrdə həyata keçirilən işlərin nəticəsi kimi bir sıra iqtisadi göstəricilərə nəzər salsaq görərik ki, 2003-cü ildə Azərbaycanda ümumi daxili məhsulun dəyəri 7,1 milyard manat olduğu halda, 2022-ci ildə 133,7 milyard manat təşkil edib.

2023-cü ilin gözləntilərinə görə 2003-cü illə müqayisədə 16,8 dəfə artım olacağı proqnozlaşdırılır. Ümumiyyətlə, 20 il ərzində ölkə iqtisadiyyatı 3,4 dəfə, ÜDM nominal ifadədə 22 dəfə artıb. Qeyri neft-qaz sektorunda ÜDM-in həcmi 2003-cü ildəki 4,4 milyard manatdan 2022-ci ildə 69,8 milyard manata çatdırılıb. Bu ilin sonuna nisbətən isə 20 ildə artım 17,6 dəfə təşkil edəcəyi gözlənilir. Dövlət büdcəsinin gəlirləri 2003-cü ildə 1 milyard 221 milyon manat idisə, 2023-cü ildə bu rəqəmin 34 milyard manata yaxın olacağı gözlənilir.

İyirmi il əvvəl regionların sosial-iqtisadi inkişafına dair dövlət proqramlarının icrasına başlayarkən Azərbaycan 1,6 milyard ABŞ dolları strateji valyuta ehtiyatlarına sahib idi. Bu il isə valyuta ehtiyatları 67 milyard ABŞ dollarını ötüb və bu da təxminən 41 dəfə artım deməkdir", - deyən deputat əlavə edib ki, Azərbaycan Ordusu ötən dövrdə dünyanın ən güclü orduları sırasında yer aldı. 2020-ci ilin Vətən müharibəsi Prezident İlham Əliyevin əzmli, qətiyyətli siyasətçi və dövlət başçısı olmaqla yanaşı, güclü strateq, hərbi incəlikləri ən yüksək səviyyədə təhlil edərək qərar verən lider olduğunu bir daha sübut etdi. Ali Baş Komandanın rəhbərliyi ilə Azərbaycan Silahlı Qüvvələri qısa müddətdə Ermənistanın 30 il ərzində havadarlarının dəstəyi ilə qurduğu ordusunu darmadağın etdi. Dövlətimizin başçısı Xankəndidən etdiyi tarixi müraciətində də bildirdi: “Biz haqlı olaraq Silahlı Qüvvələrimizlə fəxr edirik.

Azərbaycan Silahlı Qüvvələri istənilən vəzifəni şərəflə yerinə yetirə bilər və biz bunu döyüş meydanında sübut etdik, həm üç il bundan əvvəl Vətən müharibəsi dövründə cəmi 44 gün ərzində düşməni kapitulyasiya aktına imza atmağa məcbur etdik, eyni zamanda, keçən ay cəmi 23 saat davam edən antiterror tədbirləri bizim gücümüzü göstərdi və yenə də düşmən ağ bayraq qaldıraraq təslim oldu”.

Bu gün Azərbaycan xalqı öz Lideri - Prezidenti ilə fəxr edir. Verdiyi bütün vədlərə əməl edən, Qarabağ məsələsinə son qoyan Prezident hər zaman bildirib ki, o “nəyi, necə, nə vaxt etməyi” hamıdan yaxşı bilir.

“Bu il Ulu Öndərimiz Heydər Əliyevin 100 illik yubileyi qeyd edilir və ölkəmizdə “Heydər Əliyev İli” elan edilib. Ümumiyyətlə, 2023-cü il tarixi günlər baxımından çox zəngindir - bu il Azərbaycanın Milli Qurtuluşunun 30 illiyi, Prezident İlham Əliyevin dövlət başçısı seçilməsinin 20 illiyi və Ulu Öndərimizin 100 illiyidir. Bu il həm də Azərbaycanın suverenliyinin bərpası ili kimi tarixə düşdü.

Eyni zamanda, düz 100 il sonra Qarabağla bağlı ilahi ədalət öz yerini tapdı - Azərbaycan torpağında heç bir tarixi, coğrafi və siyasi əsası olmayan Dağlıq Qarabağ Muxtar Vilayəti 100 il bundan əvvəl - 1923-cü ildə yaradılmışdı. 100 il sonra bu tarixi ədalətsizliyə Prezident İlham Əliyev tərəfindən son qoyuldu. Prezident İlham Əliyev öz müraciətində vurğuladı ki, "biz istədiyimizə nail olduq. Azərbaycan xalqının onilliklər ərzində olan arzuları çin oldu. Azərbaycan xalqının ləyaqəti bərpa olundu. Biz torpaqlarımızı geri qaytarmışıq, ərazi bütövlüyümüzü bərpa etmişik". Bəli, artıq bu reallıq əbədidir və bunu dəyişməyə heç kimin gücü çatmaz. Bizim Bayrağımız Xankəndidə dalğalanır. Qarabağ Azərbaycandır!”, - deyə deputat vurğulayıb.