PREZİDENT İLHAM ƏLİYEV AZƏRBAYCAN DÖVLƏT RAYON ELEKTRİK STANSİYASINDA OLMUŞDUR
Prezident İlham Əliyev burada “Heydər Əliyev muzeyi” ilə yaxından tanış oldu. Şəhər icra hakimiyyətinin başçısı Məhəbbət Qarabağlı dedi ki, 1992-ci ilə qədər fəaliyyət göstərmiş bu muzey AXC-Müsavat hakimiyyəti dövründə şəhərin və stansiyanın o vaxtkı başabəla rəhbərlərinin təhriki ilə dağıdılmış, yüzlərlə nadir fotoşəkil və sənəd itirilmişdi. 1999-cu ildə biz bu muzeyi təzədən, daha mükəmməl şəkildə bərpa etdik. İndi bura ulu öndərimizin şərəfli ömür yolunu, zəngin elmi, siyasi, nəzəri irsini özündə yaşadan əsl canlı tarix məktəbidir. Hər gün şəhərin ali, orta ixtisas və ümumtəhsil məktəblərinin tələbə və şagirdləri buraya gəlir, bu nadir energetika kompleksinin qurucusu və yaradıcısı Heydər Əliyev zəkasının əbədiyaşar nurundan işıq alırlar.
Muzeyin direktoru Sevda Abdullayeva dövlətimizin başçısına məlumat verdi ki, burada müstəqil Azərbaycan dövlətinin qurucusu Heydər Əliyevin ölkəmizə rəhbərlik etdiyi dövrləri, ailə həyatını, xarici ölkələrə səfərlərini, Mingəçevir şəhərinə gəlişlərini əks etdirən 8 bölmədə 3 minə yaxın fotoşəkil, ulu öndərimizin zəngin həyat və fəaliyyətindən bəhs edən dəyərli kitablar toplanmışdır. Burada ümummilli liderimiz Heydər Əliyevin şərəfli ömür yolunu əks etdirən videofilmlər də göstərilir.
Prezident İlham Əliyev tələbə və şagirdlərin muzeylə tanış olmasını yüksək qiymətləndirərək, bu işin davam etdirilməsinin Heydər Əliyev irsinin öyrənilməsi baxımından əhəmiyyətli olduğunu vurğuladı.
Azərbaycan Prezidenti daha sonra stansiyanın maketi ilə tanış oldu.
Ümummilli liderimiz Heydər Əliyevin “Azərbaycan DRES-in hər bloku bir zavoddur” müdrik kəlamını xatırladan “Azərenerji” Səhmdar Cəmiyyətinin prezidenti Etibar Pirverdiyev, stansiyanın direktoru Şıxməmməd Aslanov, “Azəriqaz” Səhmdar Cəmiyyətinin sədri Əlixan Məlikov xüsusi vurğuladılar ki, müstəqil Azərbaycan dövlətinin qurucusu, ulu öndərimiz Heydər Əliyevin təşəbbüsü ilə 1981-ci ilin oktyabrında tikilib istifadəyə verilmiş DRES 186 hektar ərazini tutur. Hazırda 8 blok tam gücü ilə işləyir. 9-cu blokun inşası regionların sosial-iqtisadi inkişafı Dövlət Proqramına daxil edilmişdir. İndi həmin blokun inşası və bütövlükdə stansiyanın modernləşdirilməsi işlərinə başlamaq məqsədi ilə Avropa Yenidənqurma və İnkişaf Bankı, eləcə də İslam İnkişaf Bankı ilə danışıqlar aparılır. Rusiya və Ukrayna mütəxəssislərinin birgə iştirakı ilə xüsusi layihə işlənib hazırlanmışdır. Hazırda Qafqazın enerji nəhəngi adlandırılan bu müəssisədə çalışan 2500 nəfərin 500-ü şəhid ailələrinin üzvü, Qarabağ müharibəsi əlili və məcburi köçkünlərdir.
Azərbaycan Prezidenti İlham Əliyev DRES-in işinə toxunaraq dedi ki, o vaxt biz Rusiyadan təbii qazın alınmasına nail olmaqla böyük iş gördük. Bu, həm bizim rayonlara qazın verilməsinə imkan yaratdı, digər tərəfdən də elektrik stansiyası bu qazdan istifadə edir. Burada həm böyük iqtisadi mənfəət var, həm də qaz ekoloji cəhətdən təmiz yanacaqdır. İndi demək olar ki, 32 rayon mərkəzinə qaz verilir. Hazırda stansiyaya 6 milyon kubmetr qaz verilir, amma qış aylarında bu, 10 milyon kubmetrə çatır. Təxminən 5-6 min ton da mazut verilir. Ümumilikdə, 2000-ci ilin noyabrından bəri Rusiyadan 14 milyard kubmetr qaz alınıbdır. Onun 7,9 milyard kubmetri elektrik stansiyasına verilmişdir. Qalanı isə əhaliyə paylanır. Bizdə xaricdən qazın 1000 kubmetrini 52 dollara alırıq. Amma daxildə əhaliyə 8 dollara satılır və onun 70 faizi yığılır. İndi yaxşıdır, qabaq 30-35 faiz idi.
Ümumiyyətlə, ölkəmizin həyatında əvəzsiz iqtisadi rolu olan bu müəssisə Azərbaycan iqtisadiyyatının döyünən ürəyidir və onun yenidən qurulması layihəsinin həyata keçirilməsi dövlət əhəmiyyətli məsələdir və bunu mütləq etmək lazımdır.
Dövlətimizin başçısı layihələrin hazırlanması və həyata keçirilməsi üçün hökumət tərəfindən kömək göstəriləcəyini bildirərək dedi ki, biz bir bloku yenidən qura bilsək, onun gücünü 210 meqavatdan 330 meqavata qaldırmaq mümkündür. Bu, yaxşı olardı.
Hesab edin ki, kiçik bir stansiya tikirsən. Yenidənqurmanın hesabına bloklarda gücü 450 meqavat qaldırmaq mümkündür. Əgər biz bunu edə bilsək və sonra Sumqayıtda stansiya və “Şimal” DRES-in ikinci növbəsi tikilərsə, bu, əlavə 1200-1300 meqavat güc olacaqdır. Bu da bizə tam kifayət edəcəkdir. Hətta ixrac haqqında da fikirləşmək olar. Fikirləşin, təkliflərinizi verin. İndi İranla bir xəttin çəkilməsi haqqında razılıq əldə olunur və bu, öz həllini tapır.
Bilirsiniz, energetika iqtisadiyyatımızın əsas mühərrikidir. Xüsusilə nəzərə alsaq ki, iqtisadiyyatımız inkişaf edir, yeni müəssisələr qurulur, köhnə, sovet vaxtında tikilmiş müəssisələrin bəziləri işə düşür, deməli, enerjiyə tələbat artacaqdır. Ona görə bu sahəyə çox böyük diqqət göstəririk. Siz də təklifləri verin. Baxaq, həll edək.
Prezident İlham Əliyev muzeyin xatirə kitabına ürək sözlərini yazdı:
“Azərbaycanın ümummilli lideri Heydər Əliyevin təşəbbüsü ilə tikilmiş Azərbaycan DRES bu gün iqtisadiyyatımıza xidmət edir. Bütün digər sahələrdə olduğu kimi, energetika sektorunda da görülən böyük işlər, əldə edilən uğurlar Heydər Əliyevin adı ilə bağlıdır. Bu gün Heydər Əliyev siyasəti yaşayır, davam etdirilir. Doğma Azərbaycanımızın xoşbəxt gələcəyi bu şəxsiyyətlə bağlıdır. Azərbaycan DRES-də çalışan bütün əməkdaşlara yeni uğurlar arzulayıram.
Azərbaycan Respublikasının Prezidenti İlham Əliyev,
8 iyun 2004-cü il”.
Sonra respublikamızın rəhbəri DRES-in dispetçer məntəqəsi və digər obyektləri ilə tanış oldu, müvafiq tövsiyə və tapşırıqlarını verdi.
Sonra Prezident İlham Əliyev stansiyanın həyətinə toplaşan energetiklərlə görüşüb səmimi söhbət etdi, DRES-in vaxtilə ümummilli liderimiz Heydər Əliyev təşəbbüsü ilə istifadəyə verildiyini xatırladaraq dedi ki, təsəvvür edin, əgər bu stansiya olmasaydı, nə olacaqdı. Azərbaycan zülmətdə qalacaqdı. Görün, o, nə qədər böyük və uzaqgörən işlər görmüşdür.
Energetiklər DRES-in istifadəyə verilməsini yaxşı xatırladıqlarını və həmin anları heç vaxt unutmayacaqlarını söylədilər, bunu ulu öndərin Azərbaycan xalqı qarşısında gördüyü tarixi xidmətlərdən biri kimi qiymətləndirdilər.
Bölmənin digər xəbərləri
