Prezident İlham Əliyevin Azərbaycana dəvət etdiyi türkiyəli məktəblilər Ankaradan Bakıya yola düşüblər VİDEO
Ankara, 11 aprel, AZƏRTAC
Aprelin 11-də Kastomonu vilayətinin Kuzeykənd ibtidai məktəbinin “4 A sinif” şagirdlərindən ibarət 21 nəfərlik məktəbli heyət Esenboğa Hava Limanından Ankara-Bakı reysli sərnişin təyyarəsi ilə Bakıya yola düşüblər.
AZƏRTAC xəbər verir ki, şagird heyətini Kastomonu vilayətinin təhsil idarəsinin müdir müavini Serkan Demirkıran, Kuzeykənd ibtidai məktəbinin direktoru Ümit Yürücüoğlu, direktorun müavini Erhan Kalayçı, məktəbin “4 A” sinif müəllimləri Səma İlgaz və Naim Kayıkçı müşayiət edirlər.
Qeyd edək ki, Kastomonu vilayətinin Kuzeykənd ibtidai məktəbinin “4 A sinif” şagirdləri amerikalı məktəblinin Türkiyə Respublikasının qurucusu Mustafa Kamal Atatürkə yazdığı məktubla tanış olub, onun xoş təsiri altında Azərbaycan Prezidenti İlham Əliyevə müraciət ünvanlayıblar. Prezident İlham Əliyev türkiyəli məktəblilərin məktubuna cavab olaraq onları Azərbaycana dəvət edib. Türkiyə məktəbliləri məktublarında dövlətimizin başçısı ilə görüşmək istədiklərini və işğaldan azad olunan torpaqlarımızı ziyarəti ən böyük arzuları kimi ifadə ediblər.
Sabir Şahtaxtı
AZƏRTAC-ın xüsusi müxbiri
Ankara
Bölmənin digər xəbərləri
