Bakı, 6 may, Ceyhun Rüstəmov, AZƏRTAC

Mayın 4-də 120 dövlətin təmsil olunduğu Qoşulmama Hərəkatının sədri olan Prezident İlham Əliyevin təşəbbüsü ilə Qoşulmama Hərəkatının Təmas Qrupu formatında videokonfrans vasitəsilə koronavirusla mübarizəyə həsr olunmuş “COVID-19-a qarşı birlikdəyik” mövzusunda Zirvə görüşü keçirilib. Bu, həm siyasi əhəmiyyəti və beynəlxalq xəritədə xüsusi nüfuzu göstərən bir konfrans oldu.

Bunu AZƏRTAC-a açıqlamasında Milli Məclisin deputatı Şahin Seyidzadə deyib.

O, konfransın mühüm məsələyə həsr olunduğunu vurğulayaraq, bir neçə vacib tezisi diqqətə çatdırıb:

1. 120 ölkəni birləşdirən platformanın sədrliyini edən Azərbaycanın idarəçiliyi ilə BMT kimi təşkilatın koronavirusa qarşı mübarizədə apardığı işlərin qiymətləndirilməsi

Azərbaycan Respublikası Prezidenti İlham Əliyev: “...BMT Baş katibi Antonio Quterreş tərəfindən koronavirusa qarşı mübarizə məqsədilə qlobal humanitar cavab planının elan edilməsini, BMT Baş Assambleyasında müvafiq qətnamələrin qəbul olunmasını və Ümumdünya Səhiyyə Təşkilatının pandemiyaya qarşı qlobal mübarizədə oynadığı mühüm rolu yüksək qiymətləndiririk...”

Bu qiymətləndirmə və rəyin məhz Azərbaycan Respublikası Prezidenti tərəfindən səsləndirilməsi ölkəmizin mövqeyinin xüsusi əhəmiyyətə və nüfuza malik olduğunu göstərir.

2. Azərbaycan tərəfindən ölkəmizin Qoşulmama Hərəkatına sədrliyi və pandemiya dövrlərinin üst-üstə düşməsi məqamından səmərəli istifadə edilməsi

Azərbaycan Respublikası Prezidenti İlham Əliyev: …Razılığınız olarsa, qlobal həmrəyliyin nümunəsi kimi Qoşulmama Hərəkatının üzv ölkələri olaraq BMT Nizamnaməsində nəzərdə tutulan Baş Assambleyanın COVID-19 pandemiyasına həsr olunmuş dövlət və hökumət başçıları səviyyəsində videokonfrans vasitəsilə xüsusi sessiyasının keçirilməsi təklifi ilə çıxış edə bilərik...

BMT-nin Baş Assambleyası səviyyəsində dövlətimizin başçısı tərəfindən bu əhəmiyyətli təşəbbüsün təqdimi və eyni zamanda, Qoşulmama Hərəkatının üzvləri olan ölkələr tərəfindən bu təklifə dəstəyin olması ilə birgə videokonfransın yekun sənədinə həmin məsələnin daxil edilməsi Azərbaycanın Hərəkata sədrlik etdiyi dövrdə qlobal səviyyədə praktiki fayda göstərməklə yanaşı, gələcəkdə təklif olunan təşəbbüsün istər bu təşkilat, istərsə də BMT səviyyəsində müxtəlif yekun sənədlərdə yer almasına əsas yaradır. Yəni dövlətimizin başçısı tərəfindən edilən bu təşəbbüs beynəlxalq arenada ölkəmizin nüfuzunun daha da yüksəlməsinə zəmin yaradır.

3. 120 ölkəni birləşdirən platformada Azərbaycan dövlətinin qlobal pandemiya ilə mübarizədə yeri və rolu

Ümumdünya Səhiyyə Təşkilatının Baş direktoru Tedros Adhanom Qebreyesus: ...Mən, həmçinin fürsətdən istifadə edərək Azərbaycan xalqına, Azərbaycan hökumətinə bizə 5 milyon ABŞ dolları həcmində maliyyə dəstəyinə görə təşəkkürümü bildirirəm. Fürsətdən istifadə edərək, Zati-alinizə təşəkkürümü bildirirəm ki, Siz təşkilatımıza əlavə olaraq 5 milyon ABŞ dolları həcmində yardım göstərmisiniz...

Təsəvvür edin ki, 120 ölkəni birləşdirən platformada bu fikirlərin səsləndirilməsi Azərbaycanın yüksək nüfuzunu və koronavirusla mübarizdə beynəlxalq səviyyədə dəstəyini göstərir.

4. Pandemiya ilə mübarizədə dövlətin rəhbərlik və idarəetmənin xüsusi rolu və əhəmiyyəti

BMT-nin Baş katib Antonio Quterreş: ...Koronavirusla mübarizədə və post-pandemiya dövrlərində cəmiyyətin və iqtisadiyyatın qaçınılmaz sarsılmasından yalnız ölkələrin rəhbərliyinin cəsarətli, uzaqgörən və əməkdaşlığa əsaslanan qərarları ilə yan keçmək mümkündür...

Antonio Quterreşin çıxışında dövlət rəhbərlərinin cari krizis menecmentində əsas səriştələri dəqiq təqdim olunub. Bütün bunlar dövlətimizin başçısının atdığı addımları birbaşa olaraq əks etdirir. Pandemiya dövründə istər koronavirusun yayılması ilə mübarizə istiqamətində, istərsə də aparılan islahatların davamı olaraq verilmiş cəsarətli qərar, stabillik indeksinin “sıfır” səviyyəsində olduğu bir dövrdə bu günə yox, gələcəyə yönəlmiş uzaqgörən baxışlar və son həftələrdə bir sıra, xüsusilə də sözügedən bu videokonfransla nümayiş olunan əməkdaşlığa yönələn addımlar tam olaraq Prezident İlham Əliyevin krizis menecmentində aparılan siyasətini dolğun əks etdirir və təqdir olunur.

Beləliklə, Azərbaycan təkcə milli səviyyədə yox, eyni zamanda, regional və qlobal miqyasda da COVID-19-la mübarizədə səmərəli tədbirlər görür. Bu tədbirlər sözsüz ki, xarici dövlətlərlə birgə alınan qərarlar əsasında koronavirusla mübarizədə görülən işlərlə bağlı sıx əməkdaşlığın və möhkəm həmrəyliyin gücləndirilməsinə əhəmiyyətli töhfələr verir və beynəlxalq xəritədə Azərbaycan dövlətin mövqeyini daha möhkəm gücləndirir.