RƏSMİ XRONİKA
PREZİDENTİN MƏTBUAT XİDMƏTİNİN MƏLUMATI
Martın 13-də Türkmənistan Prezidenti Qurbanqulu Berdiməhəmmədov Azərbaycan Respublikasının Prezidenti İlham Əliyevə telefonla zəng etmişdir.
Cənab Berdiməhəmmədov Türkmənistan Prezidenti seçilməsi münasibətilə Prezident İlham Əliyevin göndərdiyi təbrik məktubuna görə minnətdarlığını bildirdi. O, ikitərəfli münasibətlərimizin daha da inkişaf etdirilməsi istiqamətində bir sıra konkret işlərin həyata keçirilməsinin vacibliyini vurğuladı.
Azərbaycan Prezidenti təbrik məktubuna görə minnətdarlıqla bağlı Türkmənistanın dövlət başçısına təşəkkürlərini bildirdi. Dövlətimizin başçısı Azərbaycan tərəfinin Türkmənistanla əməkdaşlığın daha da genişləndirilməsinə hazır olduğunu vurğulayaraq əminliyini bildirdi ki, əlaqələrimiz hər iki xalqın rifahı naminə uğurla inkişaf etdiriləcəkdir.
Dövlət başçıları müxtəlif səviyyələrdə qarşılıqlı səfərlərin təşkili məsələsini müzakirə edərək, yaxın zamanlarda bu sahədə konkret addımların atılması barədə razılığa gəldilər.
Prezidentlər regional əməkdaşlıq sahəsində də birgə işlərin görülməsinin vacibliyini qeyd etdilər. Dövlət başçıları xalqlarımız arasında dostluq və qardaşlıq əlaqələrinin ikitərəfli münasibətlərin uğurlu inkişafı üçün möhkəm zəmin yaratdığını vurğuladılar, qarşıdan gələn Novruz bayramı münasibətilə təbriklərini çatdırdılar.
Telefon söhbəti zamanı qarşılıqlı maraq doğuran bir sıra digər məsələlər də müzakirə edildi.