QAFQAZ MÜSƏLMANLARI İDARƏSİNİN SƏDRİ SƏUDİYYƏ ƏRƏBİSTANINA YOLA DÜŞMÜŞDÜR
AZƏRTAC xəbər verir ki, Qafqaz Müsəlmanları İdarəsinin sədri şeyxülislam Allahşükür Paşazadənin başçılığı ilə nümayəndə heyəti Səudiyyə Ərəbistanına yola düşmüşdür.
Aprelin 17-dək davam edəcək səfər çərçivəsində Səudiyyə Ərəbistanı Krallığının həcc naziri Fuad bin Əbdüssəlam Əl-Faisi, nazirliyin digər məsul şəxsləri ilə görüşlər keçiriləcək, Azərbaycanın bu il üçün həcc kvotası, zəvvarların yaşayış yerləri, onların daşınması ilə bağlı nəqliyyat məsələləri, çadırlarla təchizat və s. təşkilati məsələlərlə əlaqədar danışıqlar aparılacaq, müvafiq protokol və müqavilələr imzalanacaqdır.
A.Paşazadənin başçılıq etdiyi nümayəndə heyətinin Məkkə və Mədinə şəhərlərindəki müqəddəs ocaqları ziyarət etməsi də planlaşdırılır.
