QALAKTİKADAN AYRILARAQ BOŞLUĞA UÇAN ULDUZ AŞKAR OLUNMUŞDUR
Astronomlar tarixdə ilk dəfə doğma Qalaktikadan ayrılaraq, qalaktikalararası fəzaya uçan ulduz aşkar etmişlər. AZƏRTAC-ın İTAR-TASS agentliyindən aldığı xəbərə görə, ulduz qalaktikamızın mərkəzindən Ağ yola (Kəhkəşan) atılmışdır. Kəşfin müəllifi amerikalı astronom Uorren Braunun sözlərinə görə, dəyişkənliyə Ağ yolun mərkəzində gizlənən nəhəng qara çuxur səbəb olmuşdur. Məhz onun qravitasiya sahəsinin təsiri altında ulduz saatda 2 milyon kilometrdən çox sürət götürə bilmişdir ki, bu da bütün Qalaktikanın cazibə qüvvəsini aradan qaldırmaq və boşluğa uçmaq üçün vacib olan sürətdən 2 dəfə çoxdur.
Qara çuxura yaxınlaşmağa “cəsarət etmiş” bu ulduz binar ulduz sisteminə daxil idi. “Yaxınlaşma” dedikdə, kosmik ölçülər nəzərdə tutulur. Yerdəyişmə zamanı binar ulduz sistemi ilə qara çuxur arasındakı məsafə Yer kürəsi ilə Günəş arasındakı təqribən 150 milyon kilometrlik məsafədən təxminən 50 dəfə çox olmuşdur. Alimlərin fikrincə, bir-birinin ətrafında fırlanan ulduzlardan biri qara çuxura yaxınlaşmışdır. Qara çuxurun güclü qravitasiya sahəsi ulduzların fırlanmasını sürətləndirərək, onlardan birini udmuşdur. O biri ulduz əvvəlcə Qalaktikanın mərkəzindən atılmış, sonra isə onun xaricinə düşmüşdür.
Ayrılmış ulduz hazırda Yer kürəsindən təqribən 180 min işıq ili məsafəsində, Ağ yolun qallo adlanan xarici regionunda yerləşir. Xatırladaq ki, 1 işıq ili təqribən 10 trilyon kilometrlik məsafədir. Tənha ulduzun başına sonradan nələr gələcəyi hələlik məlum deyildir.
Bölmənin digər xəbərləri
